Thursday, May 23

நம்மை அழைக்கும் புதன் வியாழன் வெள்ளி

Share Subscribe
சூரிய மண்டலத்திலேயே மிகப் பெரிய கிரகமான வியாழன், மிக்ச் சிறிய கிரகமான புதன், பூமி சைஸில் உள்ள வெள்ளி ( சுக்கிரன்) ஆகிய மூன்று கிரகங்களையும் மேற்கு வானில் அருகருகே காண்கின்ற வாய்ப்பு இப்போது கிட்டியுள்ளது.
மே 26 ஆம் தேதியன்று மேற்குத் திசையில் அடிவானத்துக்கு சற்று மேலே
வியாழன், வெள்ளி, புதன் ஆகிய மூன்றும் இவ்விதமாகக் காட்சி த்ரும் நன்றி: நாஸா
குறிப்பாக மே 26 ஆம் தேதி சூரிய அஸ்தமனத்துக்குப் பிறகு மேற்கே நோக்கினால் இந்த மூன்று கிரகங்களையும் அடிவானத்துக்கு சற்று மேலே காணலாம். முக்கோணத்தின் மூன்று புள்ளிகள் போல இவை தெரியும்.

இந்த மூன்றில் மிகப் பிரகாசமானது தான் வெள்ளி.(Venus) அதன் அருகே பிரகாசம் குறைந்ததாகத் தெரிவது வியாழன்.(Jupiter) இந்த இரண்டு கிரகங்களையும் எளிதில் வெறும் கண்ணால் பார்க்க முடியும்.

இந்த இரண்டுக்கும் அருகே  மிக மங்கலான் புள்ளியாகத் தெரிவது புதன் கிரகம். ( Mercury).பொதுவில் புதன் கிரகம் கண்ணில் தென்படுவது அபூர்வம். மிக மங்கலாக இருப்பதே அதற்குக் காரணம்.எனினும் கூர்ந்து கவனித்தால் தெரியும். பைனாகுலர்ஸ் மூலம் பார்த்தால் புதனை நன்கு காண முடியும்.ஆனால் வெள்ளியையும் வியாழனையும் பார்க்க பைனார்குலர்ஸ் தேவையில்லை.

மே 26 ஆம் தேதிக்கு முன்னர் அல்லது பின்னர் இந்த மூன்றையும் காண முடியாதா என்று கேட்கலாம். வியாழனையும் வெள்ளியையும் காண இயலும். வானில் புதன் விரைவில் நகருவதாகும். ஆகவே பிற நாட்களில் அது இடம் தள்ளிக் காணப்படும்
மேலே உளள படம் மேற்படி தேதியில் கிரகங்கள் எங்கெங்கே உள்ளன் என்பதைக் காட்டுவதாகும். இதில் J என்பது வியாழன். SE என்பது செவ்வாய். Vஎன்பது வெள்ளி. M என்பது புதன். E என்பது பூமி.. நடுவில் உள்ள S என்பது சூரியன்.
மேற்கு வானில்  மூன்று கிரகங்களும் அருகருகே தென்பட்டாலும் இந்த மூன்றும் வெவ்வேறு தொலைவில் இருப்பவை.

 இந்த மூன்று கிரகங்களில் வியாழன் பூமியிலிருந்து சுமார் 90 கோடி கிலோ மீட்டர் தொலைவில் உள்ளது. வெள்ளி சுமார் 25 கோடி கிலோ மீட்டர் தொலைவிலும் புதன் சுமார் 18 கிலோ மீட்டர் தொலைவிலும் உள்ளன
.
நீங்கள் உங்கள் வீட்டு ஜன்னல் வழியே பார்வையைச் செலுத்துகிறீர்கள். அப்போது உங்கள் வீட்டைக் கடந்து ஒரு சைக்கிள் மெதுவாகச் செல்கிறது. அதற்கு அப்பால்  தெரிகிற சாலையில் ஒரு மாட்டு வண்டி செல்கிறது. அதைத் தாண்டி தொலைவில் ஒரு லாரி மெதுவாகச் செல்கிறது. நீங்கள் பார்க்கின்ற நேரத்தில் இந்த மூன்றும் வெவ்வேறு தொலைவில் தெரிகின்றன. புதன், வியாழன், வெள்ளி ஆகிய மூன்றும் வானில் நமக்கு இப்படியாகத் தான் தெரிகின்றன.
வியாழனுடன் ஒப்பிட்டால் பூமி, வெள்ளி, புதன் ஆகிய கிரகங்கள் எவ்வளவு சிறியவை
என்பதை இந்த வரைபடம் விளக்குகிறது.
ஜன்னல் வழியே பார்க்கும் போது சைக்கிள், மாட்டு வண்டி, லாரி ஆகியவை வெவ்வேறு தொலைவில் உள்ளதை நம்மால் அறிய முடிகிறது.ஆனால் வானத்தில் தெரிகின்ற மூன்று ஒளிப்புள்ளிகளாகத் தெரிகிற மூன்று கிரகங்களில்  எது எந்த தூரத்தில் உள்ளது எனபது நமக்குப் புலப்படுவதில்லை.

சூரிய மண்டலத்தில் உள்ள கிரகங்கள் எல்லாமே சூரியனைச் சுற்றி வ்ருகின்றன.தத்தம் சுற்றுபபாதையில் வெவ்வேறு வேகத்தில் சுற்றும் கிரகங்கள் அபூர்வமாக   ஒன்றன் பின் ஒன்றாக அமையும் போது வானில் அவை ஒரே பகுதியில் ஒன்று கூடி நிற்பது போன்ற தோற்றம் ஏற்படுகிறது.




Update: 27th May 2013

கீழே உள்ள போட்டோ  புதன், வியாழன், வெள்ளி ஆகிய மூன்று கிரகங்களையும் காட்டுகிறது.  போலந்து நாட்டில் உள்ள Szubin  நகரைச் சேர்ந்த Marek Nikodem மே 26 ஆம் தேதி மாலையில் இந்த போட்டோவை எடுத்தார்.( படம்  நன்றி spaceweather com


போட்டோவில்  கீழ்ப்புறத்தில் இருப்பது வெள்ளி (Venus) இடது புறம் இருப்பது வியாழன் ( Jupiter).மேற்புறத்தில் இருப்பது புதன் ( Mercury).


12 comments:

திண்டுக்கல் தனபாலன் said...

விளக்கங்களுக்கு நன்றி ஐயா...

ABUBAKKAR K M said...

வணக்கம் ஐயா.
தகவல்கள் மிகவும் எழிமையாகவும் பயனுள்ளதாகவும் உள்ளன , குறிப்பாக high school மாணவர்களுக்கு பாடத்திட்டத்தையொட்டி உள்ளன.
மிக்க நன்றி.

கே.எம்.அபுபக்கர்,
கல்லிடைக்குறிச்சி

ABUBAKKAR K M said...

ஐயா ,
இந்த கட்டுரையை படிக்கும்போது திரு.எம்.மாணிக்கராஜ் அவர்கள் 06 05 2013 ந்
தேதியிட்ட கடிதத்தில் கோரிய ஆசை ( பிரபஞ்சம் பற்றிய தொடர் கட்டுரை ) நிறைவேறும் வாய்ப்பு உள்ளதாகவே நான் நம்புகிறேன். நன்றி.
கே.எம்.அபுபக்கர்,
கல்லிடைக்குறிச்சி.

Sudhakar Shanmugam said...

பதிவுக்கு மிக்க நன்றி ஐயா

S.சுதாகர்

Anonymous said...

Thank you very much sir for sharing.

Balan balan said...

வணக்கம் ஐயா , தங்கள் பதிவுகளை தொடர்ந்து படித்து வருகிறேன் , எனக்கு ஆங்கிலத்தில் அவளவாக புலமை இல்லை , தமிழில் இந்த மாதிரி ஒரு பக்கம் தேடிக்கொண்டிருந்தேன் , உங்கள் பதிவுகள் மிகவும் பயனுள்ளதாக இருக்கின்றது. நான் ஒரு சிறிய தொலைநோக்கியை { 38mm space launcher } . இது போன்ற நிகழ்வுகளை காணவேண்டுமென்று நான் மிகவும் விருப்பபடுகிறேன் , தங்கள் தொலைபேசி எண் கிடைத்தால் , எனக்கு உதவியாக இருக்கும் .
நன்றி
செ .பாலன் { 7871005003 }

sindhya said...

வியாழன் பூமியிலிருந்து சுமார் 90 கோடி கிலோ மீட்டர் தொலைவில் உள்ளது. வெள்ளி சுமார் 25 கோடி கிலோ மீட்டர் தொலைவிலும் புதன் சுமார் 18 கிலோ மீட்டர் தொலைவிலும் உள்ளன
sir,
earth-venus distance compare panu pothu earth-mercury athigama thana irukanum?..yen kammiya iruku and earth-sun 149600000 km means earth-venus yapdi 25kodi agamudiyum...sir pls explain me when u free...

என்.ராமதுரை / N.Ramadurai said...

sindhya
பூமியிருந்து Venus கிரகம் கட்டுரையில் குறிப்பிட்டுள்ள தூரத்தில் இருப்பதற்குக் காரணம் உண்டு. கட்டுரையில் உள்ள இரண்டாவது படத்தைக் கவனிக்கவும் பூமியிலிருந்து புதன் அருகிலும் அதற்கு அப்பால் venus அதிகத் தொலைவிலும் இருப்பதைக் கவனிக்கவும்.
கிரகங்கள் சூரியனைச் சுற்றி வருகின்றன. ஆகவே அவை ஒவ்வொரு சமயத்திலும் ஒவ்வொரு இடத்தில் இருக்கும்.ஆகவே ஏதாவ்து ஒரு சமயத்தில் Venus சூரியனுக்கு மறு புறத்தில் இருக்கின்ற நிலை ஏற்படும். அப்போது அது பூமியிலிருந்து அதிகத் தொலைவில் இருக்கும். இப்போது venus அவ்விதம் அதிகத் தொலைவில் உள்ளது
.
ஆனால்

சூரியன் -- புதன் -- வெள்ளி -- பூமி

என்ற வரிசையில் இந்த கிரகங்கள் இருக்க நேர்ந்தால் அப்போது புதன் கிரகமானது வெள்ளி (Venus) கிரகத்தை விட நீங்கள் கருதுவது போல அதிகத் தொலைவில் இருக்கும்.
தங்களது சந்தேகம் தீர்ந்திருக்கும் என்று கருதுகிறேன்

Vasanth Kumar said...

Thank you very much sir
Finally I got it. I saw it in at 7.00 pm
It was appeared clearly...
But, the time moves mercury dimmed....
So much thank you sir

Vasanth Kumar said...

Thank you very much sir..
Finally I saw it....
It was appeared in 7.00 pm in the sky. The time moves on.....mercury dimmed and disappeared in 7.15 pm.. Others disappeared 7.30 pm. thank you very much I'm glad to meet you thanks for your message..

Anonymous said...

ஐயா தங்களின் பதிவுகளை எதிர்பார்த்து காத்துக்கொண்டு இருக்கிறோம்

வெங்கடேஷ்

கோவம் நல்லது said...

நல்ல சுவாரஸ்யமான பதிவுகள். தற்போது தான் தங்கள் வலைப்பூவை பற்றி தெரிந்து கொண்டேன். பல நாள் தேடலுக்கு பின் ஒரு அறிவியல் பற்றின வலைப்பூ பார்க்க கிடைத்தது. பின்தொடர வழி ஏற்படுத்தி வைக்கலாமே. ஆர்வமுள்ளவர்கள் தங்கள் பதிவுகளை தவறாமல் படிக்க உதவியாக இருக்கும்.

Post a Comment