அதென்ன வெள்ளைப் புள்ளி? நாஸா போடும் புதிர்

நாஸா அனுப்பிய டான் (Dawn) என்னும் விண்கலம் செரீஸ் (Ceres) என்னும் குட்டிக் கோளை   தொலைவிலிருந்து படம் எடுத்த போது இரண்டு வெள்ளைப் புள்ளிகள் தெரிந்தன. விண்கலம் மேலும் நெருங்கிய போது குட்டிக் கோளில் இரண்டல்ல, ஏராளமான வெள்ளைப் புள்ளிகள் தெரியலாயின. இவை என்ன என்பது ஒரு புதிராக உள்ளது.

செரீஸ் குட்டிக் கோள். சுமார்  13,600 கிலோ மீட்டர் தொலைவிலிருந்து
 2015 மே முதல் வாரம் எடுக்கப்பட்ட படம். இரு வெள்ளைப் புள்ளிகளை கவனிக்கவும்.

அதே வெள்ளிப் புள்ளிகள். 4,400 கிலோ மீட்டர் தொலைவிலிருந்து
2015 ஜூன் 10 ஆம் தேதி எடுக்கப்பட்ட படம்.

நாஸா புதிதாக எடுக்கப்பட்ட படங்களை வெளியிட்டு இவை என்னவாக இருக்கலாம் என்று நீங்கள் ஊகித்துச் சொல்லுங்கள் என்று கேட்டுள்ளது.

இவை செரீஸ் குட்டிக் கோளில் உள்ள ஆழமான பள்ளங்களில் நீண்டகாலமாக இருந்து வரும் ஐஸ் கட்டிகளா?    ஒரு வேளை இவை உப்புப் படிவுகளா? எரிமலைகளின் வாய்களா? வெந்நீர் ஊற்றுகளா? அல்லது வேறு ஏதேனும் ஒன்றா?

மிக உயரத்திலிருந்து செங்குத்தாகக் கீழே பார்க்கும் போது இவை சூரிய ஒளி பட்டு இந்த அளவில் தான் தெரியும்.

ஒப்புநோக்கும் படம்.  வலது புறம் பூமி.
இடது புறம் மேலே சந்திரன், கீழே செரீஸ்

டான் விண்கலம் அந்த குட்டிக் கோளை மேலும் நெருங்கி ஆராய இருக்கிறது. அப்போது ஏதாவது துப்பு கிடைக்கலாம் என்று கருதப்படுகிறது.

செரீஸ் குட்டிக் கோள் அஸ்டிராய்ட்  வகையைச் சேர்ந்தது. சூரியனிலிருந்து சுமார் 41 கோடி கிலோ மீட்டரில் அமைந்தபடி அது (பூமியைப் போலவே) சூரியனைச் சுற்றி வருகிறது. சூரியனை ஒரு தடவை சுற்றி முடிக்க சுமார் நாலரை ஆண்டுகள் ஆகின்றன.

பெரும்பாலான அஸ்டிராய்டுகள் ஒழுங்கற்ற உருவம் கொண்டவையாக இருக்கும். ஆனால் செரீஸ் அப்படியின்றி உருண்டையாக உள்ளது. அதன் குறுக்களவு சுமார் 960 கிலோ மீட்டர் (பூமி சுமார் 13 ஆயிரம் கிலோ மீட்டர்) செரீஸ் சந்திரனை விடவும் சிறியது.

இத்தாலிய விஞ்ஞானி பியாஸி  1801 ஆம் ஆண்டில் செரீஸ் குட்டிக் கோளைக் கண்டுபிடித்தார். அப்போதிலிருந்து தொடர்ந்து அது டெலஸ்கோப்புகள் மூலம் ஆராயப்பட்டு வருகிறது.

நாஸா 2007 ஆம் ஆண்டில் டான் விண்கலத்தை செலுத்தியது. அது முதலில் வெஸ்டா (Vesta)  என்னும்  அஸ்டிராய்டை நெருங்கி ஆராய்ந்தது. சுமார் 14 மாத காலம் வெஸ்டாவை சுற்றிச் சுற்றி வந்து பல படங்களையும் தகவல்களையும் அனுப்பியது.

டான் விண்கலம். அத்துடன் வெஸ்டா. இது ஓவியர்
தீட்டிய படம்.

பின்னர் டான் விண்கலம் அங்கிருந்து கிளம்பி செரீஸ் குட்டிக் கோளை அடைந்து இப்போது அதை சுற்றிச் சுற்றி வந்து கொண்டிருக்கிறது. முதலில் டான் விண்கலம் சுமார் 13 ஆயிரம் கிலோ மீட்டர் உயரத்தில் இருந்தபடி சுற்றி வந்தது. அடுத்து இப்போது 4,400 கிலோ மீட்டர உயரத்தில் இருந்தபடி சுற்றுகிறது.

 பிறகு 1470 கிலோ மீட்டர் உயரத்தில் பறந்தபடி ஆராயும். இறுதியில் 375 கிலோ மீட்டர் உயரத்தில் பறக்க ஆரம்பிக்கும். இவ்விதம் அது செரீஸை மிகக் குறைந்த உயரத்தில் இருந்தபடி ஆராயும் போது வெள்ளைப் புள்ளிகள் பற்றிய மர்மம் துலங்கி விடலாம் என்று கருதப்படுகிறது.

சீரீஸ் என்றொரு குட்டிக் கிரகத்தை நோக்கி விண்கலம்

செவ்வாய் கிரகத்துக்கும் வியாழன் கிரகத்துக்கும் இடையில் இருக்க வேண்டிய ஒரு கிரகத்தைக் காணோம் என்று சுமார் 200 ஆண்டுகளுக்கு முன்னர் ஜெர்மன் வானவியல் விஞ்ஞானி   ஒருவர் கூறினார். உடனே பல விஞ்ஞானிகள் “ வான் போலீஸ்” என்ற குழுவை அமைத்து டெலஸ்கோப்புகள் மூலம் வானில் தேட ஆரம்பித்தனர்.

அச்சமயத்தில் இக்குழுவில் சேராத பியாஸி என்ற இத்தாலிய விஞ்ஞானி ஒரு ’குட்டிக் கிரக’ த்தைக் கண்டுபிடித்தார். அது தான் சீரீஸ்(Ceres)எனப்படும் அஸ்டிராய்ட்  ஆகும். “காணாமல் போன” கிரகம் அதுவாக இருக்கலாம் என்று முதலில் நினைத்தனர். பின்னர் தான் எண்ணற்ற அஸ்டிராய்டுகளில் அதுவும் ஒன்று என்பது தெரிய வந்தது.

  ஒரு கிரகம் இருந்திருக்குமானால் அதற்கென ஒரு சுற்றுப்பாதை இருந்திருக்கும். விஞ்ஞானிகள் மேலும் ஆராய்ந்த போது மேற்படி சுற்றுப்பாதையில் ஒன்றல்ல, பல லட்சம் துண்டுப் பாறைகள் பறந்து செல்வது கண்டுபிடிக்கப்பட்டது. இவை அனைத்தும் அஸ்டிராய்டுகள் என்று அழைக்கப்படுகின்றன.

புள்ளி புள்ளியாக உள்ளவை அஸ்டிராய்டுகள். இவை செவ்வாயின் (Mars) மற்றும் வியாழனின் (Jupiter) சுற்றுப்பாதைகளுக்கு இடையே அமைந்துள்ளன.

 கிரிப் பிரதட்சிணம் செய்யும் பக்தர்களைப் போல இவை அனைத்தும் ஒழுங்காக சூரியனை சுற்றி வருகின்றன. இவை செல்லும் பாதையானது அஸ்டிராய்ட் வட்டாரம் (Asteroid Belt)  என்று அழைக்கப்படுகின்றது.

 அஸ்டிராய்டுகளில் உள்ள பெரிய துண்டு தான் சீரீஸ். அதன் குறுக்களவு வெறும் 950 கிலோ மீட்டர். அது சந்திரனையும் விடச் சிறியது.

வலது புறம் பூமி. இடது மேல் சந்திரன். இடது கீழ் சீரீஸ்

இப்போது அந்த சீரீஸை நோக்கி அமெரிக்க விண்கலம் டான் (Dawn) சென்று கொண்டிருக்கிறது. அது வருகிற மார்ச் மாதம்  6 ஆம் தேதி சீரீஸ் குட்டிக் கிரகத்தை நெருங்கி அதைச் சுற்ற ஆரம்பிக்கும்.

முதலில் 5000 கிலோ மீட்டர் உய்ரத்தில் இருந்தபடி சுற்றும். பிறகு கீழாக 1300 கிலோ மீட்டர் உயரத்தில் அமைந்தபடி சுற்றும். பிறகு மேலும் நெருங்கி 700 கிலோ மீட்டர் உயரத்தில் இருந்தபடி பறந்து கொண்டிருக்கும்.

சீரீஸ் படம். டான் விண்கலம் 12 லட்சம் கிலோ மீட்டரிலிருந்து எடுத்தது

சீரீஸ் அஸ்டிராய்ட்  சூரியனிலிருந்து சுமார் 41 கோடி கிலோ மீட்டர் தொலைவில் உள்ளது.( இத்துடன் ஒப்பிட்டால் பூமியானது சூரியனிலிருந்து சுமார் 15 கோடி கிலோ மீட்டர் தொலைவில் உள்ளது)

டான் விண்கலம் கடந்த 2007 ஆம் ஆண்டு விண்வெளியில் செலுத்தப்பட்டது. அது முதலில் வெஸ்டா (Vesta) எனப்படும் வேறு ஒரு அஸ்டிராய்டை  நெருங்கிச் சென்று ஆராய்ந்தது. அதை முடித்துக் கொண்டு டான் இப்போது சீரீஸை நோக்கிச் சென்று கொண்டிருக்கிறது.

சீரீஸில் பனிக்கட்டி வடிவில் தண்ணீர் இருப்பதாகக் கருதப்படுகிறது. அதற்கு அடியில் ஒருவேளை தண்ணீர் இருக்கலாம் என்ற ஒரு கருத்து உள்ளது.

 நாஸாவின் டான் விண்கலம்

அஸ்டிராய்டுகளை ஆராய்வதன் மூலம் சூரிய மண்டலத் தோற்றம் பற்றி மேலும் தகவல்களை அறிய முடியலாம் என்று விஞ்ஞானிகள் கருதுகின்றனர்.

ஊருக்கு வெளியே வந்து விழுந்த விண்கல்

மத்திய அமெரிக்க நாடான நிகராகுவாவில் கடந்த ஞாயிறு அன்று இரவு  11 மணி வாக்கில்  ( 7 ஆம் தேதி) ஒரு விண்கல் வந்து விழுந்துள்ளது. தலைநகரான மனாகுவாவில் உள்ள சர்வதேச விமான நிலையத்துக்கு வெளியே ஆள் நடமாட்டமில்லாத இடத்தில் அந்த விண்கல் விழுந்துள்ளது.

விண்கல் விழுந்த இடத்தில் 12 மீட்டர் அகலமும் 5 மீட்டர் ஆழமும் கொண்ட பெரிய பள்ளம் ஏற்பட்டுள்ளது. அந்த இடத்தைச் சுற்றி போலீசார் இப்போது தடுப்புகளை அமைத்துள்ளனர்.

விண்கல் விழுந்த இடத்தில் ஏற்பட்ட பள்ளம்

வானிலிருந்து விழுந்த வேகத்தில் அந்த விண்கல் அப்பள்ளத்துக்குள் புதைந்து கிடக்கிறதா என்று நிபுணர்கள் ஆராய்வார்கள். அதன் சிதறல்கள் பள்ளத்தைச் சுற்றிக் கிடக்கின்றனவா என்றும் ஆராய்வார்கள்.

நள்ளிரவுக்கு சற்று முன்னர் பெரிய குண்டு வெடித்தது போன்ற சத்தம் கேட்டது. நிலம் அதிர்ந்தது என்று சுற்றுவட்டார மக்கள் கூறினர். ஏதோ எரிந்தது போன்ற நாற்றம் அடித்தது என்றும் அவர்கள் கூறினர். அந்த வட்டாரத்தில் அதிர்ச்சி அலைகளும் உணரப்பட்டன.

நல்ல வேளையாக அது அருகே உள்ள மனாகுவா நகருக்குள்ளாக விழவில்லை. மனாகுவாவின் மக்கள் தொகை சுமார் 12 லட்சம். இந்த விண்கல் விழுந்ததால் ஏற்பட்ட அதிர்ச்சி அலைகள் பூகம்பத்தைப் பதிவு செய்வதற்காக உள்ள கருவியிலும் பதிவாகியுள்ளன.

நிகராகுவாவில் விழுந்த விண்கல்லானது அதே நாளன்று பூமியைக் கடந்து சென்ற அஸ்டிராய்ட் ஒன்றின் உடைந்து துண்டு தானா என்று கேள்வி எழுந்துள்ளது.  சுமார் 20 மீட்டர் நீளம் கொண்ட  அந்த அஸ்டிராய்ட்  அன்றைய தினம் பூமியிலிருந்து சுமார்  34 ஆயிரம் கிலோ மீட்டர் தூரத்தில் பூமியைக் கடந்து சென்றது.

அஸ்டிராய்ட் என்பது ஒரு குன்று சைஸ் கொண்டதாகவும் இருக்கலாம்.  சிறியதும் பெரியதுமாக எண்ணற்ற அஸ்டிராய்டுகள் உள்ளன. இவற்றில் பலவும் சூரியனைச் சுற்றுகின்றன. அப்படியான அஸ்டிராய்டுகள் பூமியைக் கடந்து செல்வதுண்டு.

செப்டம்பர் 7 ஆம் தேதி இரவு அஸ்டிராய்ட் ஒன்று பூமியைக் கடந்து சென்றது.
அது கடந்து சென்ற பாதையைக் காட்டும் படம் Credit NASA/JPL/Caltec

இது ஒரு புறம் இருக்க, கூழாங்கல் சைஸ் அல்லது அதை விடவும் சிறிய  கற்கள் பூமியின் காற்று மண்டலத்தில் நுழைந்த வண்ணம் உள்ளன. அப்படி அவை காற்று மண்டலம் வழியே பல ஆயிரம் கிலோ மீட்டர் வேகத்தில் கீழ் நோக்கி இறங்கும் போது மிகுந்த அளவுக்கு சூடேறித் தீப்பிடித்து வானில் நடுவழியிலேயே அழிந்து போகலாம். கடைசியில் நுண்ணிய சாம்பல் தான் மிஞ்சும்.

சில பெரிய கற்கள் அவ்விதம் அழிந்து போகாமல் முழுதாகப் பூமியில் வந்து விழும். நிகராகுவாவில் வந்து விழுந்த விண்கல் அப்படிப்பட்டதாக இருக்கலாம்.

ஆனால் நிகராகுவாவில் விழுந்தது பெரிய பாறாங்கல் என்று சொல்லத்தக்க விண்கல் என்று வைத்துக்கொண்டால அது  தீப்பிடித்து தரையை நோக்கி இறங்கும்  போது வானில் பிரகாசமான ஒளிக்கீற்று தெரிந்திருக்க வேண்டும். இரவு நேரம் என்பதால் யார் கண்ணிலாவது ஒளிக்கீற்று பட்டிருக்க வேண்டும். அப்படி ஒளிக்கீற்று தென்பட்டதாக இதுவரை தகவல் இல்லை.

எங்கிருந்து வருகுது விண்கல்?

ரஷியாவில்  நடுவானில் வெடித்த விண்கல் எங்கிருந்து வந்திருக்க வேண்டும் என்பதை நிபுணர்கள் கண்டுபிடித்துள்ளனர். அது வந்த பாதையையும் அவர்களால் கணக்கிட முடிந்துள்ளது.

விண்கல் எங்கிருந்து வருகிறது? இக்கேள்வியிலேயே பதில் அடங்கியுள்ளதாகக் கூறலாம். விண்கற்கள் அனைத்துமே விண்ணிலிருந்து தான் வருகின்றன.சொல்லப் போனால் விண்வெளியில் ஒன்றல்ல லட்சக் கணக்கில் விண்கற்கள் இருக்கின்றன. நெல்லிக்காய் சைஸிலான விண்கற்களையும் சேர்த்துக் கொண்டால் கோடானு கோடி விண்கற்கள் உள்ளன.

ஆனால் இவை எதுவும் மரத்தில் மாங்காய தொங்குவதைப் போல பூமிக்கு மேலே  வானில் நிலையாக ஓரிடத்தில் இருப்பது கிடையாது. எல்லா விண்கற்களுமே பயங்கர வேகத்தில் சூரியனைச் சுற்றி வருகின்றன.

சூரிய மண்டலத்தில் பூமி, புதன்,  வெள்ளி, செவ்வாய், வியாழன் முதலான கிரகங்கள் தனித்தனிப் பாதையில் சூரியனைச் சுற்றி வருகின்றன. இதே மாதிரியில் விண்கற்களுக்கும். தனிப் பாதை உண்டு.இது செவ்வாய் கிரகத்துக்கும் வியாழன் கிரகத்துக்கும் நடுவே உள்ளது. இது Main Asteroid Belt என்று குறிப்பிடப்படுகிறது.

செவவாய் (Mars) கிரகத்துக்கும் வியாழன் (Jupiter) கிரகத்துக்கும் இடையே உள்ள அஸ்டிராய்டுகள் 

 சுமார் 450 கோடி ஆண்டுகளுக்கு முன்னர் சூரிய மண்டலம் தோன்றிய போதே இந்த விண்கற்களும் தோன்றியதாகக் கருதப்படுகிறது.ஒரு பெரிய பங்களாவைக் கட்டி முடித்தபின் பார்த்தால் மீதியாக் இருக்கும் செங்கற்கள் ஒருபுறம் கிடக்கும். மிஞ்சிய மணல், ஜல்லி,ஆகியவையும் காம்பவுண்ட் சுவர் கட்டியது போக மிஞ்சிய பெரிய கருங்கற்களும் கிடக்கும். இது போல சூரிய மண்டலமும் கிரகங்களும் உருவான பின்னர் இந்த் விண்கற்கள் மிஞ்சி நின்றதாகத் தோன்றுகிறது. ஆரம்பத்தில் இந்த விண்கற்கள் கூட்டத்தில் பல கோடி விண்கற்கள் இருந்திருக்க வேண்டும்.

விண்கற்கள் உள்ள் இடத்தில் ஒரு கிரகம் உருவாகியிருக்க வேண்டும் என்றும் அப்படி உருவாமல் போனதால அந்த இடத்தில் விண்கற்களாகக் காணப்படுகின்றன.என்றும் ஒரு கருத்து உண்டு. பெரியதும் சிறியதுமான துண்டுகள் ஒன்று சேர்ந்து தான் கிரகங்கள் உருவாகின .பூமியும் இப்படித்தான் உருவாகியது.

சூரிய மண்டலத்தின் கிரகங்கள் தோன்றிய சில காலத்துக்குப் பின்னர் அதாவது சுமார் 390 கோடி ஆண்டுகளுக்கு முன்னர் ஏதோ ஒரு பயங்கர   நிகழ்ச்சியின் விளைவாக விண்கற்கள் கூட்டத்திலிருந்து  எண்ணற்ற விண்கற்கள் பூமி, சந்திரன், புதன், வெள்ளி (சுக்கிரன்), செவ்வாய் முதலிய கிரகங்கள் அமைந்த திசையை நோக்கிப் புயல் போல் கிள்ம்பி இந்த கிரகங்களைத் தாக்கின.

விண்கற்கள் தாக்குதலால் சந்திரனில் ஏற்பட்டுள்ள பள்ளங்கள். செவ்வாய், புதன் கிரகங்களிலும் இதே போன்ற பள்ளங்கள் உள்ளன

இவ்விதம் விண்கற்கள் தாக்கியதால் ஏற்பட்ட வட்டவடிவப் பள்ளங்களை இன்றும் சந்திரன், புதன், செவ்வாய் ஆகிய கிரகங்களில் காண முடிகிறது  பூமியில்  இவை அபூர்வமாகவே தென்படுகின்றன.விண்கற்கள் தாக்கியதால்  பூமியில் ஏற்பட்ட பள்ளங்கள்  காற்று ,மழை மற்றும் பூகம்பம் காரணமாக மேடிட்டுப் போயின. அல்லது பெரிய ஏரியாக மாறின.( வெள்ளி கிரகத்தின் தரையை நம்மால் இன்னும் விரிவாகக் காண முடியவில்லை என்பதால் வெள்ளி கிரகம் பற்றி எதுவும் திட்டவட்டமாகக் கூற முடியாது)

ஆனால் விண்கற்களால் பூமி உட்பட இந்த நான்கு கிரகங்கள் மீதான தாக்குதல் அடியோடு நின்று விடவில்லை. ஒரு கிரகத்தை அதன் பாதையிலிருந்து வெளியே தள்ள முடியாது. ஆனால் விண்கற்கள் அப்படி அல்ல.செவ்வாய், மற்றும் வியாழன் ஆகியவற்றின் ஈர்ப்பு சக்தியானது  விண்கற்கள் கூட்டத்தில்  அவ்வப்போது சலனத்தை உண்டாக்குகின்றன. இதன் விளைவாக விண்கற்கள் அவற்றின் பாதையிலிருந்து அவ்வப்போது வெளியே தூக்கி எறியப்படுகின்றன.

இந்த மேப்பில் நீல நிறத்தில் உள்ளது பூமியின் சுற்றுப்பாதை.இதை குறுக்காகக் கடக்கும் அஸ்டிராய்டுகள் சிலவற்றின் நீள்வட்டப்பாதைகள் படத்தில் காட்டப்பட்டுள்ளன

இப்படி தூக்கி எறியப்பட்ட விண்கற்கள் சூரியனை வழக்கமான பாதையில் சுற்றுவதற்குப் பதிலாக நீள் வட்டப் பாதையில் சுற்ற முற்படுகின்றன. அதாவது அவை செவ்வாய், பூமி, வெள்ளி, புதன் ஆகியவற்றின் சுற்றுப்பாதைகளை குறுக்காகக் கடக்கின்றன. இது ஆளில்லா லெவல் கிராசிங் வழியே லாரியும் பஸ்ஸும் ரயில்பாதையைக் கடப்பதற்கு ஒப்பானது.

பூமியின் சுற்றுப்பாதையை ஒரு விண்கல் கடக்கும் நேரத்தில் அதற்கும் பூமிக்கும் இடையே உள்ள தூரம் பல ஆயிரம் கிலோ மீட்டராக இருக்குமானால் பிரச்சினை இல்லை. ஆனால் பூமி தனது சுற்றுப்பாதையில் எந்த இடத்தில் இருக்கிறதோ அந்த இடம் வழியே விண்கல் கடக்க முயன்றால் பிரச்சினைதான்.லெவல்கிராசிங்கில் லாரி மீது ரயில் மோதுவது போன்று பூமியின் மீது விண்கல் மோத நேரிடும். ரஷியாவில் இது மாதிர்த்தான் நிகழ்ந்துள்ளது.

அஸ்டிராய்ட் ஒன்று எவ்விதம் பூமியின் பாதையை க் குறுக்காகக் கடக்கிறது என்பதை விளக்கும் படம். எண்ணற்ற அஸ்டிராய்டுகள் இவ்வித்ம் பூமியின் பாதையைக் கடந்து செல்கின்றன

இது வரை நாம் பொதுவில் விண்கல் என்றே குறிப்பிட்டு வந்தோம். ஒரு விண்கல் பல நூறு கிலோ மீட்டர் நீளம் கொண்டதாக இருக்கலாம். அல்லது சில மீட்டர் நீளம் கொண்டதாகவும் இருக்கலாம். ஆரம்பத்தில் குறிப்பிடப்பட்ட Main Asteroid Belt ல் இப்படி வெவ்வேறு சைஸ்களிலான விண்கற்கள் உள்ளன. பொதுவில் பெரிய சைஸில் உள்ள விண்கற்களை அஸ்டிராய்ட் என்று குறிப்பிடுகின்றனர்.அந்த அளவில் இருபது அல்லது முப்பது மீட்டர் நீளமுள்ள விண்கற்களும் அஸ்டிராய்டுகள் என்றே குறிப்பிடப்படுகின்றன.

மாங்காய் சைஸ் அல்லது கூழாங்கல் அளவுக்கு இருக்கும் விண்கற்களும் விண்வெளியில் நிறையவே உள்ளன.இப்படியான விண்கல் ஒன்று வானிலிருந்து விழுவதை உங்களால் எளிதில் காண முடியும். இது பற்றி அடுத்த பதிவில் கவனிப்போம்.

இந்த வாரம் இரவு வானில் ஒளி மழை

இந்த வாரம் 13 ஆம் தேதி மற்றும் 14 ஆம் தேதி  இரவில்  வானிலிருந்து ஒளி மழையாகப் பொழியும். வானிலிருந்து சர் சர் என்று ஒளிக் கீற்றுகள் கீழ் நோக்கி இறங்கும். ஆனால் இந்த ஒளிக்கீற்று எதுவுமே தரை வரை வராது.

சாதாரண நாட்களில் நீங்கள் இரவு வானில்  ‘ நட்சத்திரம் கீழே விழுவதை’ பார்த்திருப்பீர்கள். நுண்ணிய துணுக்கு ஒன்று காற்று மண்டலத்தில் நுழைந்த பின்னர் தீப்பற்றிக் கீழ் நோக்கி இறங்கும் போது ஏதோ ஒரு நட்சத்திரம் விழுவதைப் போலத் தோன்றும். மணல் துணுக்கு போன்ற வெறும் துணுக்கு தான் இப்படி ஆர்ப்பாட்டமான காட்சி காட்டுகிறது..சில சமயங்களில் இது கூழாங்கல் சைஸில் இருக்கலாம்.

வானிலிருந்து இறங்கும் ஒளிக்கீற்று. இது  வெறும் துணுக்கு தான்.Credit Via Cumbrian Sky 

ஆண்டில் குறிப்பிட்ட  சமயத்தில் இரவு வானில்  மணிக்குப் பல நூறு துணுக்குகள் வீதம் இப்படி  நெருப்புப் பொறிகளாகக் கீழே இறங்கினால் அது கண்கொள்ளாக் காட்சியாக இருக்கும். இந்த மாதம் மேற்படி இரு தேதிகளில் வானில் இக்காட்சியைக் காணலாம். வானவியலார் இதற்கு ஜெமினைட் ஒளிமழை (Geminid Meteor Shower ) என்று பெயரிட்டுள்ளனர்.

இந்தத் துணுக்குகள் எங்கிருந்து வந்தன?  சாலை வழியே வலை போட்டு மூடாமல் குப்பை லாரி போனால் அந்த லாரியிலிருந்து வழி நெடுக குப்பை கீழே விழுந்தபடி செல்லும். அல்லது மணல் லாரி போனால் வழி நெடுக மணல் சிந்திக் கிடக்கும்

இந்த மாதிரியில் ஒரு வால் நட்சத்திரம் சூரியனைச் சுற்றி விட்டுச் செல்வதறகாக வரும் போதும் சூரியனைச் சுற்றி விட்டுத் திரும்பிச் செல்லும் போதும் அந்த வால் நட்சத்திரத்திலிருந்து எண்ணற்ற நுண்ணிய துணுக்குகள் வெளிப்படும். ஆகவே வால் நட்சத்திரம் சென்று விட்ட பிறகும் அது சென்ற  பாதையில் இந்த துணுக்குகள் மிதந்தபடி இருக்கும். விண்வெளியில் காற்று கிடையாது என்பதால் இவை அடித்துச் செல்லப்படாமல் அதே இடத்தில் இருக்கும்.

பூமியானது சூரியனைச் சுற்றி  வருகையில் இவ்விதத் துணுக்குகள் இருக்கும் இடத்தைக் கடந்து செல்லும். அப்போது இந்த்த் துணுக்குகள் பூமியின் காற்று மணடலம் வழியே இறங்கும். அப்போது இந்த ஒளிமழை நிகழும்.

ஆண்டுதோறும் ஆகஸ்ட் 12 ஆம் தேதி வாக்கில் பெர்சைட் ஒளிமழை (Perseid Meteor Shower )  நிகழும். அதே போல  நவம்பரில் Leonid Meteor Shower  நிகழும். டிசம்பர் மத்தி வாக்கில் ஜெமினைட் ஒளிமழை.தோன்றும். இந்த மாத மத்தியில்  இது காணப்படும் என்றாலும் 13 ஆம் 14 ஆம் தேதிகளில் தான் உச்சத்தில் இருக்கும் என்று எதிர்பார்க்கப்படுகிறது.

ஜெமினைட் ஒளிமழைக்குக் காரணமாகக் கருதப்படும் பேயிதான் அஸ்டிராய்டின் சுற்றுப்பாதை 

ஜெமினைட் ஒளிமழை உச்சம் இந்த ஆண்டு அமாவாசை தினத்தன்று நிகழ்வதால் வானவியல் ஆர்வலர்களுக்கு மிக வசதி. ஒளிமழைக் காட்சி இரவு வானில் நன்கு தெரியும். சில ஆண்டுகளில் இது  பௌர்ணமி வாக்கில் நிகழும். அப்படி ஏற்படும் போது ஒளிமழைக் காட்சி எடுப்பாக இராது.

அமெரிக்காவிலும் ஐரோப்பாவிலும் பெரும்பாலானவர்கள் கார் வைத்திருப்பர் என்பதால் ஒளிமழைக் காட்சியைக் காண்பதற்கு ஊருக்கு வெளியே -- சுற்றுவட்டாரத்தில் விளக்கு வெளிச்சமே இல்லாத பொருத்தமான திறந்த வெளிக்குப் போய் முகாமிட அவர்களால் இயலும்.ஜெமினைட் ஒளிமழையைக் காண்பதற்கு  இரவு ஒரு மணி முதல் மூன்று வரையிலான நேரம் உகந்தது என்று சொல்லப்படுகிறது.

எங்குமே வெளிச்சமில்லாத இடத்துக்கு சென்ற பின் அந்த இருட்டுக்கு உங்கள் கண்கள் பழகிக் கொள்ள சுமார் 20 நிமிஷம் ஆகும. அதன் பின்னரே உங்களால் வானிலிருந்து கீழ் நோக்கி இறங்குகின்ற ஒளிக்கீற்றுகளை நன்கு காண இயலும் என்று  இது தொடர்பான நிபுணர்கள் கூறியுள்ளனர். நகரில் வசிப்பவர்கள் நள்ளிரவில் எழுந்து மொட்டை மாடியில் நின்று பார்த்தால் சில ஒளிக்கீற்றுகளைத் தான் காண இயலும் என்று கூறப்படுகிறது.

இந்த ஒளிமழைக்கு ஜெமினைட் என்று பெயர் வைக்கப்பட்டுள்ளதற்குக் காரணம் உண்டு. வானில் மிதுன ராசிக்கு ஆங்கிலத்தில் Gemini  என்று பெயர்.  அந்த ராசி உள்ள வான் பகுதியிலிருந்து இந்த ஒளிமழை வருவது போலத் தோன்றும். ஆகவே தான் இது Geminid  என அழைக்கப்படுகிறது

பெர்சைட் ஒளிமழை, லியோனிட் ஒளிமழை ஆகியவை  வால் நட்சத்திரங்களிலிருந்து வெளிப்பட்ட துணுக்குகளால் ஆனவை என்று அறியப்பட்டுள்ளது.

வானில் மிதுன Gemini ராசி உள்ள பகுதியிலிருந்து தான் ஒளிகீற்றுகள் கீழ் நோக்கிப் பாயும். 

ஆனால் ஜெமினைட் ஒளிமழைக்கான காரணம் அதாவது அந்த ஒளிமழையைத் தோற்றுவிக்கும் துணுக்குகள் எப்படித் தோன்றின என்பது திட்டவட்டமாகத் தெரியவில்லை.

பொதுவில் ஒளிமழைக்கு வால் நட்சத்திரங்களின் துணுக்குகள் காரணமாக இருந்தாலும் ஜெமினிட் ஒளிமழைக்கு 3200 பேயிதான் என்னும் பெயர் கொண்ட அஸ்டிராய்ட் காரணமாக இருக்கலாம் என்று கருதப்படுகிறது. அதாவது இந்த அஸ்டிராய்ட் சூரியனை நெருங்கும் போது அதிலிருந்து வெளிப்பட்ட துணுக்குகள் காரணமாக இருக்கலாம் என்று கருதப்படுகிறது. இந்த் அஸ்டிராய்ட் அவவப்போது சூரியனை சுற்றிவிட்டுச் செல்கின்றது.

பீதி கிளப்ப பிப்ரவரியில் வருகுது ஓர் அஸ்டிராய்ட்

முதலாவதாக மாயன் கேலண்டர், நிபுரு சமாச்சாரம், இரண்டாவதாக  பூமி மூன்று நாள் இருளில் மூழ்கும் என்ற சமாச்சாரம் ஆகியவை வெறும் புருடா என்பது இந்த மாதக் கடைசியில் நிரூபணமாகி விடும். ஆனால் புருடா ஆசாமிகள் சொல்லாத சமாச்சாரம் ஒன்று உள்ளது.

அதாவது வருகிற ஆண்டு பிப்ரவரி 15 ஆம் தேதி ஓர் அஸ்டிராய்ட் பூமியின் மீது உராயாத குறையாக பூமியை மிக அருகில் கடந்து செல்ல இருக்கிறது.பறக்கும் பாறை என்று சொல்லத்தக்க  இந்த அஸ்டிராய்ட் நிச்ச்யம் பூமி மீது மோதாது என்று நாஸா விஞ்ஞானிகள் கூறியுள்ளனர்.

எனினும் ஓர் அஸ்டிராய்ட் பூமிக்கு இவ்வளவு அருகில் வந்து செல்வது என்பது அபூர்வமே.அந்த வகையில் இது முக்கியத்துவம் பெறுகிறது. கடந்த பல நூறு ஆண்டுகளில் எந்த அஸ்டிராய்டும் பூமிக்கு இவ்வளவு அருகில் வந்தது கிடையாது என்று கூறப்படுகிறது

இது 6 கிலோ மீட்டர் நீளம் கொண்ட ஓர்  அஸ்டிராய்ட்.
 பிப்ரவரியில் வருவது இதை விட மிகச் சிறியது.  

அஸ்டிராய்ட் ஒன்று பூமியைக் கடந்து செல்வது என்பது சர்வ சாதாரணமாக நடைபெறுவதாகும். ஒவ்வொரு மாதமும் பல அஸ்டிராய்டுகள் பூமியைக் கடந்து சென்று கொண்டிருக்கின்றன. நடப்பு டிசம்பர் மாதத்தில் மூன்று அஸ்டிராய்டுகள் பூமியைக் கடந்து செல்கின்றன.

சொல்லப்போனால் அடுத்த ஆண்டு பிப்ரவரி மாதம் 15 ஆம் தேதி இரண்டு அஸ்டிராய்டுகள் பூமியைக் கடந்து செல்ல இருக்கின்றன ஒன்றின் பெயர்  1999 YK 15 என்பதாகும். சுமார் 2 கிலோ மீட்டர் நீளம் கொண்ட  அது பூமியை 2 கோடி கிலோ மீட்டர் தொலைவில் கடந்து செல்லும். அதைப் பற்றி எந்தக் கவலையும் இல்லை.

ஆனால் அதே தேதியில் 2012 DA 14 என்னும் பெயர் கொண்ட  இன்னொரு அஸ்டிராய்டும் பூமியைக் கடந்து செல்ல இருக்கிறது. அது தான் பீதி கிளப்பக்கூடியது. அதன் நீளம் 48 மீட்டர். . அந்த அஸ்டிராய்ட் பூமியைக் கடந்து செல்லும் போது ஒரு கட்டத்தில் பூமிக்கும் அஸ்டிராய்டுக்கும் இடையிலான தூரம் சுமார் 24 ஆயிரம் கிலோ மீட்டராக இருக்கும். விண்வெளி அலகில் இது ‘ மிக அருகில்’ என்று சொல்லக்கூடியதாகும்.

அஸ்டிராய்ட் 2012 DA 14  பூமியைக் கடந்து செல்லும் பாதை
பூமியைச் சுற்றியுள்ள வட்டம் செயற்கைக்கோள்கள் சுற்றும் பாதை 

பூமியிலிருந்து சுமார் 36 ஆயிரம் கிலோ மீட்டர் உயரத்தில்இந்தியாவின் இன்சாட் செயற்கைக்கோள்கள் உட்பட  எண்ணற்ற இணைசுற்று செயற்கைக்கோள்கள் (Geostationary satellites) பறந்து கொண்டிருக்கின்றன. அவற்றுக்கும் பூமிக்கும் இடையில் அஸ்டிராய்ட் பறந்து செல்லும். அப்போது அதன் வேகம் மணிக்கு சுமார் 22 ஆயிரம் கிலோ மீட்டர் அளவில் இருக்கும்.

ஒரு வேளை இது பூமியின் மீது மோதினால் என்ன ஆகும்? இதை மோதல் என்றே சொல்ல முடியாது. உண்மையில் இந்த அஸ்டிராய்ட்    ஒரு போயிங் விமானத்தை விடச் சிறியது. ஆகவே  இந்த அஸ்டிராய்ட் பூமியில் விழுந்தால் என்ன ஆகும் என்று கேட்பது தான் பொருத்தமாக இருக்கும்.

ஆனால் வானில் பறக்கின்ற விமானம் கீழே விழுவதற்கும் அஸ்டிராய்ட் பூமியில் வந்து விழுவதற்கும் நிறைய வித்தியாசம் உண்டு, போயிங் விமானத்தின் எடை சில நூறு டன். ஆனால்.2012 DA 14 அஸ்டிராய்டின் எடை 1,30,000 டன்.  தவிர, அது பல ஆயிரம் கிலோ மீட்டர் வேகத்தில் பாய்ந்து வரும்.

பூமியின் பெரும் பகுதி கடல்களே. ஆக்வே அது கடலில் விழலாம். தவறி நிலப் பகுதியில் விழுந்தால் அணுகுண்டு வீசப்பட்ட அளவுக்கு விளைவு ஏற்படும். ஒரு நகரம் அழிந்து போகலாம். அவ்வளவு தான். பூமி மொத்த்ததுக்கும் அழிகிற வாய்ப்புக்கே இடமில்லை.

அவ்வப்போது பூமி உள்ள வட்டாரத்தில் தலை காட்டுகின்ற அஸ்டிராய்டுகளை நாஸா தொடர்ந்து கண்காணித்து வருகிறது. இதுவரை 1353 அஸ்டிராய்டுகள் பற்றியும் அவை செல்லக்கூடிய பாதை பற்றியும் விரிவான த்கவலகள் சேகரிக்கப்பட்டுள்ளன. ஆனால் இத்தனை நாள் தட்டுப்படாமல்  இந்த ஆண்டு பிப்ரவரியில் தான் இந்த அஸ்டிராய்ட் கண்டுபிடிக்கப்பட்டது.ஸ்பெயின் நாட்டில் உள்ள வான் ஆய்வுக்கூடம் இதனைக் கண்டுபிடித்த்தது.

இவ்வளவு நாள் இது கண்டுபிடிக்கப்படாமல் இருந்ததற்கு 2012 DA 14 அஸ்டிராய்ட் பூமியை ஒட்டியபடி இருந்து வந்துள்ளதே காரணம். பூமியைப் போலவே இந்த அஸ்டிராய்டும் சூரியனை சுற்றுகிறது.

பச்சை நிறத்தில் இருப்பது சூரியனை பூமி சுற்றும் பாதை
மஞ்சள் நிறத்தில் இருப்பது 2012 DA 14 அஸ்டிராய்ட் சுற்றும் பாதை 

சூரியனை ஒரு முறை சுற்றி முடிக்க பூமியானது 365.24 நாட்களை எடுத்துக் கொள்கிறது.இந்த அஸ்டிராய்டோ 366.24 நாட்களை எடுத்துக் கொள்கிற்து.  இரண்டின் சுற்றுப்பாதைகளும் அருகருகே உள்ள்ன. அந்த வகையில் ஒவ்வொரு ஆண்டும் இந்த அஸ்டிராய்ட் பூமியை இரண்டு தடவை  கடந்து செல்கின்றது. இந்த ஆண்டுஅதாவது பத்து மாதங்களுக்கு முன்னர்  பிப்ரவரியில் அது பூமியை கடந்து சென்ற போது பூமிக்கும் அந்த அஸ்டிராய்டுக்கும் இடையிலான தொலைவு சுமார் இரண்டரை லட்சம் கிலோ மீட்டராக இருந்தது.

பன்னெடுங்காலமாக ஆண்டுக்கு இரு த்டவை பூமியைக் கடந்து செல்கின்ற ஓர் அஸ்டிராய்ட் இத்தனை நாள் கழித்து இப்போது பூமியில் வந்து விழுவதற்கு வாய்ப்பே கிடையாது தான். ஆகவே தான் இந்த அஸ்டிராய்டினால் ஆபத்து இல்லை என்று நாஸா விஞ்ஞானிகள் கூறுகின்றனர்.

வருகிற பிப்ரவரியில் இது பூமியை ‘ மிக அருகில் ‘ கட்ந்து செல்லும் நாளன்று விஞ்ஞானிகள் பலர் அமெரிக்காவில் மத்திய புளோரிடா பல்கலைக் கழகத்தில் கூடி அஸ்டிராய்ட் கடந்து செல்லும் காட்சியைக் காண்பர். இந்த அஸ்டிராய்டை வெறும் கண்ணால் பார்க்க முடியாது. சக்திமிக்க பைனாகுலர்ஸ் அல்லது டெலஸ்கோப் மூலம் காண முடியும்.

சூரிய மண்டலத்தில் செவ்வாய் கிரகத்துக்கும் வியாழன் கிரகத்துக்கும் இடையே ஒரு கிரகம் உருவாகியிருக்க வேண்டும் என்றும் ஆனால் அப்படி உருவாகாமல் போனதாகவும் கருதப்படுகிறது. அப்படி அங்கு ஒரு கிரகம் உருவாகாமல் போனதால் பல லட்சம் துண்டுகள் அந்த கிரகம் இருந்திருக்க வேண்டிய சுற்றுப்பாதையில் அமைந்தபடி சூரியனை சுற்றி வருகின்றன.. அவையே அஸ்டிராய்டுகள் ஆகும். அஸ்டிராய்டுகள் அமைந்த பாதையிலிருந்து விலகி எவ்வளவோ துண்டுகள் தனிப்பாதை அமைந்துக் கொண்டு சூரியனை சுற்றி வருகின்றன. இவற்றில் சில ஆயிரம் அஸ்டிராய்டுகள் பூமிக்கு அருகாமையில் வந்து செல்கின்றன.(காண்க: பூமியை நோக்கி வரும் அஸ்டிராய்ட்)http://www.ariviyal.in/2011/10/blog-post_23.html

குட்டிக் கோளுக்குத் தாவும் அமெரிக்க விண்கலம்

சூரியனை பூமி உட்பட ஒன்ப்து கிரகங்கள் சுற்றுவது நமக்குத் தெரியும். கிரகங்கள் மட்டுமன்றி  பல லட்சம் குட்டிக் கோள்களும் சூரியனைச் சுற்றுகின்றன  கிரிப் பிரதட்சிணம் செய்கின்ற கூட்டம் போல  இவை ஒரே கும்பலாகச் செல்கின்றன.

இவற்றில் பெரும்பாலானவை சைஸில் சிறியவை. மலை அளவுள்ள குட்டிக் கோள்கள் உண்டு. பறக்கும் பாறாங்கல் என்று சொல்லத் தக்கவையும் உள்ளன. வெறும் 7 மீட்டர் குறுக்களவு கொண்ட ’குட்டிக் கோளும்’  உண்டு.

சூரியனை அஸ்டிராய்டுகள் சுற்றும் பாதை 

எனினும் சில  பெரும் தலைகளும் உள்ளன. சீரீஸ் (Ceres), பல்லாஸ் (Pallas), வெஸ்டா (Vesta), யுரோப்பா (Europa) ஆகியவை குறிப்பிடத்தக்கவை. சீரீஸ் குறுக்களவு 950 கிலோ மீட்டர். வெஸ்டா குறுக்களவு 525 கிலோ மீட்டர். (இவற்றுடன் ஒப்பிட்டால் பூமியின் குறுக்களவு 12,756 கிலோ மீட்டர். சந்திரனின் குறுக்களவு சுமார் 3500 கிலோ மீட்டர்). இந்த அஸ்டிராய்டுகளில் வெஸ்டா சூரியனிலிருந்து சுமார் 37 கோடி மீட்டர் தொலைவிலும் சீரீஸ் 43 கோடி கிலோ மீட்டர் தொலைவிலும் அமைந்துள்ளன.

அஸ்டிராய்ட் வெஸ்டா. இது டான்  எடுத்த ப்டம்

குட்டிக் கோள்கள் அனைத்தையும் அஸ்டிராய்ட்ஸ் (Asteroids)  என்ற பொதுப் பெயரில் குறிப்பிடுகின்றனர். அஸ்டிராய்டுகளில் வெஸ்டா, சீரீஸ், பல்லாஸ் போன்றவற்றைக் குட்டிக் கோள்கள் என்று வருணித்தால் அது பொருத்தமே. ஆனால் பெரும்பாலானவை  மிகவும் சிறியவை என்பதால் அவற்றை அஸ்டிராய்ட் என்று வருணிப்பதே பொருத்தமாக இருக்கும்

வலமிருந்து: பூமி, சந்திரன், சீரீஸ், வெஸ்டா

சூரியனை பூமி தனிப் பாதை அமைத்துக் கொண்டு சுற்றி வருகிறது. மற்ற கிரகங்களும் அப்படியே. இது போலவே அஸ்டிராய்டுகள் அனைத்துக்கும் சூரிய மண்டலத்தில் தனிப் பாதை உண்டு. இது Asteroid Belt  என்று அழைக்கப்படுகிறது. இப்பாதை செவ்வாய் கிரகத்துக்கும் வியாழன் கிரகத்துக்கும் இடையே அமைந்துள்ளது.

விஞ்ஞானிகளுக்கு அஸ்டிராய்டுகள் மீது தனி ஆர்வம் உண்டு. இவை அனைத்தும் சூரிய மண்டலம் தோன்றிய போது அதாவது சுமார் 450 கோடி ஆண்டுகளுக்கு முன்னர் உண்டானவை. அவை அன்று இருந்தது போல இன்றும் இருப்பதாக கருதப்படுகிறது. ஆகவே அஸ்டிராய்டுகளை ஆராய்ந்தால் பூமி மற்றும் கிரகங்களின் தோற்றம் பற்றி மேலும் அறிய முடியும் என்று விஞ்ஞானிகள் கருதுகின்றனர்.

அஸ்டிரார்ய்ட் வெஸ்டாவில் உள்ள ஒரு மலை. டான் எடுத்த படம்

கடந்த பல ஆண்டுகளில் ஆளில்லா விண்கலங்களை அனுப்பி பல அஸ்டிராய்டுகள் ஆராயப்பட்டுள்ளன. அமெரிக்க விண்கலம் ஒன்று  ஈராஸ் என்ற அஸ்டிராய்டில் போய் மெல்ல இறங்கி சாதனை படைத்தது. ஜப்பான் அனுப்பிய ஹயாபுசா என்ற விண்கலம் ஓர் அஸ்டிராடை நெருங்கி லேசாக சுரண்டி சில நூறு நுண்ணிய துணுக்குகளை சேகரித்துக் கொண்டு  வெற்றிகரமாக பூமிக்குத் திரும்பியது.

அமெரிக்காவின் நாஸா அமைப்பு  ஒரு கல்லில் இரண்டு மாங்காய் என்ற ஏற்பாடாக  வெஸ்டா, சீரீஸ் ஆகிய இரு அஸ்டிராய்டுகளை ஆராய 2007 ஆம் ஆண்டில் ‘டான்’(DAWN) என்னும் பெயர் கொண்ட விண்கலத்தை அனுப்பியது. டான் 2011 ஜூலை 15 ந் தேதி வாக்கில் வெஸ்டாவுக்குப் போய்ச் சேர்ந்தது.

அந்த அஸ்டிராய்டை டான் ஓராண்டுக் காலம் சுற்றிச் சுற்றி வந்து ஆராய்ந்து பல தகவல்களை சேகரித்து அனுப்பியது.வெஸ்டாவிலிருந்து டான்  இந்த ஆண்டு ஆகஸ்ட் 12 ஆம் தேதி கிளம்புவதாக ஆரம்பத்தில் திட்டமிடப்பட்டது.ஆனால் டான் தனது   ஆய்வை முடித்துக் கொண்டு  இம்மாதம் 5 ஆம் தேதி தான்  அங்கிருந்து சீரீஸ் நோக்கிக் கிள்ம்பியது.டான் அடுத்து சீரீஸ் அஸ்டிராய்டை 2015 பிப்ரவரி வாக்கில் அடைந்து அதனை ஆராய்த் தொடங்கும். ஒரே விண்கலத்தைக் கொண்டு இரு அஸ்டிராய்டுகள் ஆராயப்படுவது இதுவே முதல் தடவை.

அஸ்டிராய்ட் சீரீஸ். ஹ்ப்புள் தொலை நோக்கி எடுத்த படம் 

சுமார் 200 கோடி ஆண்டுகளுக்கு முன்னர் வெஸ்டா மீது இரண்டு த்டவை ஏதோ மோதியதாகக் கருதப்படுகிறது. அதன் விளைவாக அப்போது தூக்கி எறியப்பட்ட துண்டுகள் பலவும் காலப் போக்கில் பூமியில் விண்கற்களாக வந்து விழுந்துள்ளன.பூமியில் வந்து விழுந்துள்ள விண்கற்களில் ஐந்து சதவிகிதம் வெஸ்டாவிலிருந்து வந்தவையாக இருக்கலாம் என்ற் கருத்தும் உள்ளது.

அஸ்டிராய்ட் வெஸ்டாவிலிருந்து வந்ததாகக் கருதப்படும் விண்கல்

அஸ்டிராய்ட் ஒன்றுக்கு விண்கலத்தை அனுப்பி செயற்கைக்கோள் போல சுற்ற்ச் செய்வது என்பது மிகவும் கடினமானது. விண்கலம் அஸ்டிராய்டின் பிடியில் சிக்கினால் தான் விண்கலம் அஸ்டிராய்டை சுற்ற ஆரம்பிக்கும். அஸ்டிராய்ட்  என்பது வடிவில் சிறியது என்பதால் அதன் ஈர்ப்பு சக்தி ஒப்பு நோக்குகையில் மிகவும் குறைவாக இருக்கும். ஆகவே விண்கலத்தின் வேகத்தை மிகவும் குறைத்தால் தான் அது அஸ்டிராய்டின் பிடியில் சிக்கும்.

பல கோடி கிலோ மீட்டருக்கு அப்பால் உள்ள விண்கலத்துக்குத் தக்க நேரத்தில் ஆணைகளைப் பிறப்பித்தால் தான் அது அஸ்டிராய்டின் பிடியிலிருந்து விடுபடும். இதை அடுத்து அதை வேறு ஓர் அஸ்டிராய்டை நோக்கி தகுந்த பாதையில் செல்லும்படி செய்ய வேண்டும். இதுவும் கடினமான பணியே. வெஸ்டாவின் பிடியிலிருந்து விடுபட்ட டான் விண்கலம் இப்போது சீரீஸ் குட்டிக் கோளை நோக்கித் தனது பயணத்தைத் தொடங்கியுள்ளது.


டான் விண்கலம் தானாக வேகத்தைப் பெற முடியாது. ஆகவே அதில் இருந்த அயனி  பீச்சு கருவிகள் (Ion Propulsion Thruster) செய்லபட ஆரம்பித்ததும் டான் அங்கிருந்து கிளம்பியது.

டான் விண்கலம் பின்பற்றிய பாதை. வெஸ்டாவிலிருந்து டான் ஆகஸ்ட் 12 ஆம் தேதி கிளம்பும் என எதிர்பார்த்து இப் படம் வரையப்பட்டது. ஆனால் டான் செப்டம்பர் 5 ஆம் தேதி தான் கிளம்பியது

நாஸா விஞ்ஞானிகள் வெஸ்டா, சீரீஸ் ஆகிய இரு அஸ்டிராய்டுகளைத் தேர்ந்தெடுக்கக் காரணம் உண்டு. வெஸ்டா வெறும் பாறை. ஆனால் சீரீஸ் அஸ்டிராய்டின் மேற்புறம் தூசு படிந்துள்ளது.. மெல்லிய அளவில் ஐஸ் கட்டியும் படிந்துள்ளது. அதற்கு அடியில் தண்ணீர் இருக்கலாம் என்று கருதப்படுகிறது.

டான் விண்கலம் வெஸ்டாவுக்குப் போய்ச் சேர 150 கோடி கிலோ மீட்டர் பயணம் செயதது. இப்போது அது வெஸ்டாவிலிருந்து சீரீஸ் போய்ச் சேர வளைந்த பாதையில் 273 கோடி கிலோ மீட்டர் பயணம் செய்தாக வேண்டும். மிக நீண்ட பயணம் தான்.

விண்வெளியில் உள்ள ’பறக்கும் மலைகள் ‘ யாருக்குச் சொந்தம்?

பூமியும் சந்திரனும் இருக்கின்ற வட்டாரத்தை நோக்கி ‘பறக்கும் மலைகள்’ என்று சொல்லத்தக்க பெரும் பாறைகள் அவ்வப்போது ‘சர், சர்’ என்று வேகமாக வரும். ஆனால் அவை பூமியின் மீது அல்லது சந்திரன் மீது மோதாமல் தமது சுற்றுப் பாதையில் வேகமாகச் சென்று விடும். இவற்றுக்கு   ‘ஆபத்தை உணடாக்கக்கூடிய் அஸ்டிராய்டுகள்’ என்று பெயர். உதாரணமாக மே 19 ஆம் தேதியன்று 31 மீட்டர் நீளம் கொண்ட அஸ்டிராய்ட் சுமார் 9 லட்சம் கிலோ மீட்டர் தொலைவில் பூமியைக் கடந்து செல்ல இருக்கிறது.

இந்த ஆண்டு ஏப்ரல் கடைசியிலான நிலவரப்படி இப்படியான அஸ்டிராய்டுகள் மொத்தம் 1287 உள்ளன. இந்த அஸ்டிராய்டுகள் காலம் காலமாக வந்து போய்க் கொண்டிருக்கின்றன. பூமியுடன் மோத வாய்ப்பில்லை தான். ஆனாலும் அமெரிக்க விண்வெளி அமைப்பான நாஸா பல்வேறு வழிகளில் இவற்றைக் கண்காணித்து வருகிறது.

அஸ்டிராய்ட் ஐடா

நாம் இந்த அஸ்டிராய்டுகள் குறித்து கவலைப்படுவதற்குப் பதில் இந்த அஸ்டிராய்டுகள் இனி மனிதனைக் கண்டு பயப்படலாம் .காரணம். அமெரிக்காவின் கோடீஸ்வர முதலாளிகள் இந்த அஸ்டிராய்டுகள் மீது கண் வைத்து விட்டனர்.

அஸ்டிராய்டுகளிலிருந்து பிளாட்டினம், தங்கம் போன்ற அரிய உலோகங்களை வெட்டி எடுத்து வரும் நோக்கில் இப்போது அமெரிக்காவில் தனி கம்பெனி அமைக்கப்பட்டுள்ளது. பிரபல ஹாலிவுட் படத் தயாரிப்பாளரும் கோடீஸ்வரருமான ஜேம்ஸ் கேமரான், கூகுள் நிறுவனர் லாரி பேஜ், கூகுள் சேர்மன் எரிக் ஷ்மிட் முதலானோர் முதலீடு செய்து Planetary Resources  என்னும் நிறுவனத்தைத் தொடங்கியுள்ளனர்.

அஸ்டிராய்டுகளில் நிறைய உலோகம் அடங்கிய அஸ்டிராய்ட், பெரிதும் பாறையால் ஆன அஸ்டிராய்ட் என பல வகைகள் உண்டு. பெரிதும் உலோகத்தால் ஆன அஸ்டிராய்டில் பிளாட்டினம், தங்கம் போன்ற விலையுயர்ந்த உலோகங்கள் அடங்கியிருக்கும்.

பிளாட்டினமும் தங்கமும் நிறைய உள்ளதாகக்
கூறப்படும் அஸ்டிராய்ட் 3554 அமுன்

இரண்டு கிலோ மீட்டர் குறுக்களவு கொண்ட 3554 அமுன் எனப்படும் அஸ்டிராய்டில் இரும்பு மற்றும் நிக்கல் உலோகங்கள் 8 லட்சம் கோடி டாலர் மதிப்புக்கு உள்ளன. கோபால்ட் எனப்படும் உலோகம் 6 லட்சம் கோடி டாலர். பிளாட்டினம், தங்கம் ஆகிய உலோகங்களின் மதிப்பு மேலும் 6 லட்சம் கோடி டாலர் என்று ஜான் லூயிஸ் என்ற நிபுணர் கூறுகிறார்.

இந்த அமெரிக்க நிறுவனத்தினர் அஸ்டிராய்டுகளிலிருந்து தண்ணீரையும் பெறுவதற்குத் திட்டமிட்டுள்ளனர். இத்தண்ணீரிலிருந்து ஆக்சிஜனையும் ஹைட்ரஜனையும் தனித்தனியே பிரித்து அவற்றைத் திரவமாக்கி விண்வெளியிலிலேயே பெரிய டாங்கிகளில் சேமித்து வைக்கவும் திட்டம் உள்ளது. உயரே செல்கின்ற ராக்கெட்டுகளுக்கு அவற்றை எரிபொருட்களாக விலைக்கு விற்க முடியும்.

அஸ்டிராய்டுகளிலிருந்து உலோகங்களை எடுப்பது என்பது ஏதோ புதிதாகத் தோன்றிய கருத்து அல்ல. விண்வெளி ராக்கெட் இயலின் தந்தை என்று வர்ணிக்கப்படும் ரஷிய மேதை கான்ஸ்டாண்டின் சியோல்கோவ்ஸ்கி 1903 ஆம் ஆண்டிலேயே இது பற்றிய கருத்தை வெளியிட்டார்.

சூரிய குடும்பத்தில் அஸ்டிராய்ட் மண்டலம்

சூரிய மண்டலத்தில் அஸ்டிராய்டுகள் தனி வகை. செவ்வாய் கிரகத்தின் சுற்றுப்பாதைக்கும் வியாழன் கிரகத்தின் சுற்றுப்பாதைக்கும் இடையே அஸ்டிராய்ட் மண்டலம் உள்ளது. அங்கு லட்சோப லட்சம் அஸ்டிராய்டுகள் உள்ளன. குடியரசு தின விழாவில் அணிவகுத்துச் செல்லும் ராணுவ வீரர்கள் போல இவை அனைத்தும் ஓர் ஒழுங்குடன் அணிவகுத்துச் செல்பவையாக சூரியனைச் சுற்றுகின்றன.

இந்த அஸ்டிராய்ட் மணடலத்திலிருந்து பல ஆயிரம் அஸ்டிராய்டுகள் தனியே கிளம்பி பூமிக்கு அருகே வந்து செல்கின்றன. இவ்விதமான அஸ்டிராய்டுகள் மீது தான் குறிப்பாக கவனம் செலுத்தப்படும்.

விண்வெளித் துறையில் இன்று எவ்வளவோ முன்னேற்றங்கள் ஏற்பட்டுள்ளன. சந்திரனுக்குச் சென்று வருவதை விட அஸ்டிராய்டுக்குச் சென்று வருவது சுலபமானதே. சந்திரனுக்கும் அத்துடன் கிரகங்களுக்கும் ஈர்ப்பு சக்தி உண்டு. ஆகவே அவற்றில் போய் இறங்கினால் ஈர்ப்பு சக்தி காரணமாக அங்கிருந்து எளிதில் உயரே கிளம்ப முடியாது. ராக்கெட் உயரே கிளம்புவதற்கு நிறைய எரிபொருள் தேவைப்படும். அவற்றுடன் ஒப்பிட்டால் அஸ்டிராய்டுகளில் போய் இறங்குவதும் அங்கிருந்து கிளம்புவதும் எளிது. வடிவில் அவை சிறியவை என்பதால் அஸ்டிராய்டுகளின் ஈர்ப்பு ச்கதி மிகக் குறைவாக இருக்கும். ராக்கெட் உயரே கிளம்புவதற்கு கொஞ்சம் எரிபொருள் இருந்தாலும் போதும்.

நாஸா அனுப்பிய டான் (Dawn) என்னும் செயற்கைக்கோள் பூமியிலிருந்து சுமார் 18 கோடி கிலோ மீட்டர் தொலைவில் உள்ள வெஸ்டா என்னும் அஸ்டிராய்டை அடைந்து அதைச் சுற்றி வருகிறது.

அஸ்டிராய்ட் வெஸ்டா 

பூமியில் பல நூறு டன் எடை கொண்ட ஒரு பொருளின் எடை அஸ்டிராய்ட் ஒன்றில் மிக அற்ப அளவில் இருக்கும். ஆகவே அங்கிருந்து அரிய உலோகங்கள் அடங்கிய பாறையை எடுத்துக் கொண்டு உய்ரே கிளம்புவது எளிது. சொல்லப் போனால் அவற்றை பூமியில் கொண்டு வந்து இறக்குவது தான் மிகக் கடினமான வேலையாக இருக்கும்.

இத்திட்டத்தை மேற்கொள்வோர் முதலில் தகுந்த அஸ்டிராய்டுகளைத் தேர்ந்தெடுக்க பூமிக்கு மேலே பல டெலஸ்கோப்புகளைப் பறக்க விடுவர். இது இரண்டு ஆண்டுகளில் சாத்தியமாகி விடும் என்று கருதப்படுகிறது. அடுத்த கட்டப் பணி அஸ்டிராய்டுகளுக்கு அனுப்புவதற்காகத் தானியங்கி ரோபாட்டுகளை உருவாக்குவதாகும். மூன்றாவது கட்டத்தில் தான் அஸ்டிராய்டுகளில் ரோபாட்டுகளை இறக்கி அரிய உலோகங்கள் அடங்கிய பாறைகள் வெட்டி எடுக்கப்படும்.

புதிய நிறுவனம் ஏற்கெனவே 25 எஞ்சினியர்களை வேலைக்கு அமர்த்திக்கொண்டுள்ளது. இவர்களில் பலர் முன்னர் அமெரிக்க நாஸா அமைப்பில் வேலை பார்த்தவர்கள்.

எடுத்த எடுப்பில் இவர்கள் ஒரு முக்கிய பிரச்சினையை சமாளிக்க வேண்டியிருக்கும். சந்திரன், கிரகங்கள், விண்வெளி பற்றி 1967 ஆம் ஆண்டில் சர்வதேச சட்டம் உருவாக்கப்பட்டது. இதன்படி எந்த நாடும் விண்வெளியில் உள்ள சந்திரன் மற்றும் கிரகங்கள் மீது உரிமை கொண்டாட முடியாது. இதில் அஸ்டிராய்டுகளும் அடங்கும். சர்வதேச சட்டத்தில் அரசுகள் பற்றித் தான் கூறப்பட்டுள்ளதே தவிர, தனியார் கம்பெனிகள் பற்றி எதுவும் கூறப்படவில்லை என்று வாதிக்கப்படுகிறது.

அஸ்டிராய்டுகளிலிருந்து பிளாட்டினம், தங்கம் மற்றும் முக்கியத்துவம் வாய்ந்த உலோகங்களை எடுத்து வருவது என்பது நல்ல திட்டம் தான். ஆனால் இப்படி அஸ்டிராய்டுகளிலிருந்து ஏராளமான அளவில் பிளாட்டினம், தங்கம் ஆகியவை பூமிக்கு வரும் போது உலக மார்க்கெட்டில் இவற்றின் விலை ஒரேயடியாகச் சரிந்து போக வாய்ப்புள்ளது.உதாரணமாக தங்கத்தின் (ஒரு பவுன்) விலை ரூ 20 ஆயிரத்திலிருந்து ஒரு பவுன் ரூ 2000 ஆகக் குறைந்து போனால் என்ன ஆகும்? பெண்ணைப் பெற்றவர்கள் ரொம்ப சந்தோஷப்படுவார்கள்.

அமெரிக்க வானில் அதிசய ஒளி, பயங்கர இடி முழக்கம்

அமெரிக்காவில் கலிபோர்னியா, நெவாடா மாகாணங்களில் வசிப்பவர்களுக்கு ஏப்ரல் 22 ஆம் தேதி ஞாயிறு காலை அபூர்வ அனுபவம் ஏற்பட்டது. அதை பயங்கர அனுபவம் என்றும் கூறலாம். காலை 8 மணி அளவில் வானில் அதிசய ஒளி தென்பட்டது. ஒரு போதும் கண்டிராத ஒளியாக, பெரிய நெருப்பு உருண்டையாகக் காட்சி அளித்தது. அந்த பகல் நேரத்திலும் வீட்டுக்குள் இருந்தவர்களின் நிழல் விழுந்தது. அந்த அளவுக்கு ஒளி பிரகாசமாக இருந்தது.

அந்த ஒளி தோன்றியதைத் தொடர்ந்து இடி முழக்கத்தை மிஞ்சும் சத்தம் - இரண்டு முறை இப்படி நிகழ்ந்தது. வீடுகள் அதிர்ந்தன. குழந்தைகள் பயத்தால் அலறின. வீடுகளில் இருந்தவர்கள் நிலை தடுமாறி சுவர் மீதும் ஜன்னல் மீதும் மோதினர்.

விண்கல் ஒன்று பூமியை நோக்கி
இறங்குவதை விளக்கும் வரைபடம்

கலிபோர்னியா பிராந்தியத்தில் அடிக்கடி நில நடுக்கம் ஏற்படுவதுண்டு. ஆகவே சிலர் இது நில நடுக்கமோ என்று சந்தேகித்தனர். நில நடுக்கமல்ல என்று பின்னர் உறுதிப்படுத்திக் கொண்டனர்.

கலிபோர்னியா, நெவாடா மாகாணங்களில் சுமார் 600 கிலோ மீட்டர் பிராந்தியத்தில் இக்காட்சி தென்பட்டுள்ளது. வாஷிங் மெஷின் அளவிலான விண்கல் காற்று மண்டலத்தில் நுழைந்து தீப்பிடித்து வெடித்த போது தான் இப்படியான அதிசய விளைவுகள் ஏற்பட்டன என்று விஞ்ஞானிகள் கூறுகின்றனர்.

பலரும் இரவு வானில் எப்போதாவது ’ நட்சத்திரம் விழுவதை’ பார்த்திருக்கிறோம். கலிபோர்னியாவிலும் நெவாடாவிலும் நடந்துள்ளது அது போன்ற, ஆனால் அதை விடப் பெரிய சமாச்சாரம்.

விண்கல் எவ்விதம் நெருப்பு உருண்டையாகக்
காட்சி அளிக்கும் என்பதைக் காட்டும் படம்

பூமி என்ற இந்தப் பெரிய உருண்டை அந்தரத்தில் அமைந்திருப்பதாகச் சொல்லலாம். பூமியைச் சுற்றி அமைந்த விண்வெளியில் தூசு, கடுகு அல்லது மிளகு அளவிலான எண்ணற்ற கற்கள், நெல்லிக்காய் மற்றும் ஆரஞ்சுப் பழ அளவிலான கற்கள் என பல வகையான கற்கள் எங்கிருந்தோ வந்து ஏதோ ஒரு திசை நோக்கி வேகமாகப் போய்க் கொண்டிருக்கின்றன. இவற்றில் சில எப்போதாவது பூமியின் காற்று மண்டலம் வழியே கீழ் நோக்கிப் பாய்வது உண்டு.

கடுகு, அல்லது மிளகு அள்விலான கற்கள் சில, காற்று மண்டலத்தில் நுழைந்தால் மேலும் மேலும் வேகத்தில் இறங்கும். அப்போது அவை காற்றை மேலும் அதிக அளவில் அழுத்தும் போது கடுமையான அளவுக்கு சூடேறி தீப்பற்றும். இதன் விளைவாக அக்கற்கள் தீப்பிழம்பாகி ஒளி வீசியபடி கீழ் நோக்கிப் பாயும்.அத்துணுக்கு முற்றிலுமாக அழிந்து பொடியாக உதிர்ந்து விடும். இதைத் தான் நாம் ‘நட்சத்திரம் விழுகிறது’ என்கிறோம் (நட்சத்திரம் விழுவதைப் பார்க்க நேர்ந்தால் உடனே பச்சை மரத்தைப் பார்த்தாக வேண்டும் என்று கிராமப்புறங்களில் கூறுவார்கள்).

நட்சத்திரங்கள் கோடானு கோடி கிலோ மீட்டருக்கு அப்பால் இருப்பவை. அதே சமயம் சூரியனை விடப் பல மடங்கு பெரியவை. அவை பூமியில் வந்து ‘விழ’ என்றுமே வாய்ப்பில்லை. ஒரு நட்சத்திரம் பூமியை நோக்கி வருவதாக ஒரு பேச்சுக்கு வைத்துக் கொண்டால் அந்த நட்சத்திரம் பூமியை வந்து அடைவதற்கு முன்னரே பூமி பொசுங்கி அழிந்து போய் விடும். ஆகவே அடுத்த தடவை வானில் நீங்கள் ஒளிக்கீற்றைக் கண்டால் அது ஒரு சிறிய கல் என்பதை நினைவில் வைத்துக் கொள்ளுங்கள்.

அபூர்வமாக வடிவில் பெரிய கல் வந்து விழுமானால் அது காற்று மண்டலம் வழியே இறங்கும் போது பயங்கர சத்த்த்துடன் வெடிக்கும். அதனால் ஏற்படும் அதிர்ச்சி அலைகளால் கட்டடங்கள் அதிரும். அத்துடன் ஒளிக்கீற்று பெரிய அளவில் இருக்கும். அந்த பெரிய கல் பல சமயங்களிலும் துண்டு துண்டுகளாகக் கீழே விழுவது உண்டு. அவை சேகரிக்கப்பட்டு பாதுகாப்பாக வைக்கப்படுகின்றன்.

இப்படியாக பூமியில் வந்து விழுந்த கற்களை மியூசியத்தில் காணலாம். இவற்றை விண்கல் (Meteorite) என்று குறிப்பிடுகின்றனர். சில சமயம் பெரிய விண்கல அவ்வளவாகச் சேதமடையாமல் பூமியில் வந்து விழுவதுண்டு. ஆப்பிரிக்காவில் நமீபியா நாட்டில் வந்து விழுந்த விண்கல் இதற்கு உதாரணம். இதன் எடை 60 டன். இது சுமார் 80 ஆயிரம் ஆண்டுகளுக்கு முன்னர் வந்து விழுந்திருக்கலாம் என்று கருதப்படுகிறது.

நமீபியா நாட்டில் விழுந்த விண்கல்.
இதன் எடை 60 டன்.

பல கோடி ஆண்டுகளுக்கு முன்னர் சூரிய மணடலத்தில் ஏற்பட்ட ஏதோ களேபரத்தின் விளைவாகப் பல கிலோ மீட்டர் நீள அகலம் கொண்ட -- மலை அளவிலான -- பிரம்மாண்டமான பாறைகள் பூமி, சந்திரன், புதன், செவ்வாய், வெள்ளி முதலான கிரகங்களைத் தாக்கின. இதன் விளைவாக வட்ட வடிவிலான பெரிய பெரிய பள்ளங்கள் தோன்றின. சந்திரன், செவ்வாய், புதன் ஆகியவற்றில் இப்பள்ளங்களை இன்றும் காணலாம். பூமியில் ஏற்பட்ட பள்ளங்கள் மழை, காற்று, தாவர வள்ர்ச்சி ஆகியவை காரணமாக இருந்த இடம் தெரியாமல் போயின.

விண்கற்கள் வந்து விழுந்ததால்
சந்திரனில் ஏற்பட்ட பள்ளங்கள்

அதன் பின்னரும் அபூர்வமாக பெரிய பாறை பூமியில் வந்து விழுந்தது உண்டு. அமெரிக்காவில் அரிசோனா மாகாணத்தில் உள்ள Barringer Crater என்னும் வட்ட வடிவப் பள்ளம் பெரிய பாறை வந்து விழுந்ததால் ஏற்பட்டதே. சுமார் 50 ஆயிரம் ஆண்டுகளுக்கு முன்னர், 45 மீட்டர் அகலம் கொண்ட விண்கல் வந்து விழுந்ததால் இது தோன்றியுள்ளதாக விஞ்ஞானிகள் கருதுகின்றன்ர்.

பூமியும் சந்திரனும் இருக்கின்ற இடம் நோக்கி Asteroid எனப்படும் பெரிய பாறைகள் இப்போதும் வந்து போய்க் கொண்டிருக்கின்றன. கடந்த ஏப்ரல் 21 ஆம் தேதி 18 மீட்டர் நீளம் கொண்ட ஓர் அஸ்டிராய்ட் பூமியை 36 லட்சம் கிலோ மீட்டர் தூரத்திலிருந்தபடி கடந்து சென்றது. வருகிற ஏப்ரல் 28 ஆம் தேதி 67 கிலோ மீட்டர் நீளம் கொண்ட ஓர் அஸ்டிராய்ட் பூமியை சுமார் 5 லட்சம் கிலோ மீட்டர் தொலைவில் கடந்து செல்லும். பூமியை பயமுறுத்தக்கூடியவை என்று வகைப்படுத்தப்பட்டுள்ள அஸ்டிராய்டுகள் சுமார் 1200 உள்ளன.

அமெரிக்காவில் அரிசோனா மாகாணத்தில் உள்ள
வட்ட வடிவப் பள்ளம்

அமெரிக்க நாஸா அமைப்பு இந்த அஸ்டிராய்டுகளின் சுற்றுப்பாதைளைத் தொடர்ந்து கவனித்து வருகிறது. ஓர் அஸ்டிராய்ட் பூமிக்கு அருகில் வருமேயானால் இயற்கை விதிகளின்படி முதலில் அது வெடித்துச் சிதறும். அதன் சிதறல்கள் பூமியைச் சுற்ற ஆரம்பிக்கும். ஒரு பெரிய அஸ்டிராய்ட் பூமியின் மீது வந்து மோதுவதற்கான வாய்ப்புகள் மிக மிகக் குறைவு. பத்து கோடி ஆண்டுகளுக்கு ஒரு முறை இவ்விதம் அஸ்டிராய்ட் ஒன்று பூமியின் மீது வந்து மோதலாம் என்று சில விஞ்ஞானிகள் கூறுகின்றனர்.

சுமார் 6 கோடி ஆண்டுகளுக்கு முன்னர் ஓர் அஸ்டிராய்ட் வந்து பூமியில் மோதியதன் விளைவாகத்தான் டைனோசார் வகை விலங்குகள் அழிந்ததாகச் சொல்லப்படுகிறது. இதைப் பின்புலனாக வைத்துத் தான் ஜுராசிக் பார்க் என்ற ஹாலிவுட் சினிமாப் படம் எடுக்கப்பட்டது.

வால் நட்சத்திரத்துக்கு ஆறு வால்கள்

ஐரோப்பியர் பல நூற்றாண்டுகளுக்கு முன்னர் வால் நட்சத்திரங்களை ‘பிசாசுகள்’ என்று கருதினர். நவீன காலத்தில் சர் பிரெட் ஹாயிலும் (Sir Fred Hoyle) சந்திரா விக்ரமசிங்கேயும்(Wickramasinghe) வால் நட்சத்திரங்களை கிருமிகளைக் கொண்டு வரும் ‘வில்லன்கள்’ என வர்ணித்தனர். எனினும் வால் நட்சத்திரங்களை சூரிய மண்டலத்தின் கோமாளிகள் என்றும் சொல்லலாம்.

சர்க்கஸ் கோமாளி அவ்வப்போது வெவ்வேறு வேஷத்தில் வருவது போல வால் நட்சத்திரங்கள் விதவிதமான வடிவில் வருகின்றன. அட்டகாசமான வாலுடன் காணப்படும் வால் நட்சத்திரங்கள் உண்டு. சில வால் நட்சத்திரங்கள் பெரிய தலையுடன் காணப்படுகின்றன. பொதுவில் வால் நட்சத்திரத்துக்கு ஒரு வால் தான் உண்டு. ஆனால் மூன்று வால்கள் அல்லது ஆறு வால்களுடன் மிரட்டிய வால் நட்சத்திரங்கள் கடந்த காலத்தில் தெனபட்டுள்ளன.

1744 ஆம் ஆண்டில் தோன்றிய வால் நட்சத்திரம் இவ்விதம் ஆறு வால்களைக் கொண்டதாக இருந்தது. அக்காலத்தில் கேமிரா கிடையாது. பிரெஞ்சு ஓவியர் வரைந்த படத்தைக் கீழே காணலாம்.

ஆறு வால்களுடன் கூடிய வால் நட்சத்திரம்.
தலை அடிவானத்துக்கு கீழே உள்ளது.

1957 ஆம் ஆண்டில் தோன்றிய ஒரு வால் நட்சத்திரத்துக்கு கூரிய மூக்கு இருந்தது. படம் கீழே.

கூர் மூக்கு வால் நட்சத்திரம்

வால் நட்சத்திரங்கள் அனைத்துமே சூரிய குடும்பத்தைச் சேர்ந்தவை என்பதை மறந்து விடக்கூடாது. ஆகையால் தான் அவை சூரியனைச் சுற்றுகின்றன.

ஒரு கால கட்டத்தில் பூமி தான் மையத்தில் இருப்பதாகவும் சூரியன், சந்திரன், கிரகங்கள் என அனைத்தும் பூமியைச் சுற்றுவதாகவும் தவறான கருத்து நிலவியது. போலந்து நாட்டைச் சேர்ந்த விஞ்ஞானி கோப்பர்னிகஸ்(Copernicus) சூரியன் தான் நடுவில் இருக்கிறது என்று கண்டுபிடித்தார். ஆனால் அதை வெளியே பகிரங்கமாகச் சொல்லப் பயந்தார். பின்னர் அவரது கொள்கை நிலைநாட்டப்பட்டது.  ஆனாலும் வால் நட்சத்திரங்களைப் பற்றி கோப்பர்னிகஸுக்குப் பிறகு வந்த கெப்ளர் (Kepler)அல்லது வேறு விஞ்ஞானிகளால் சரியான விளக்கத்தை அளிக்க இயலவில்லை.

எட்மண்ட் ஹாலி

கடைசியில் சர் ஐசக் நியூட்டன்(Sir Isaac Newton) தான் சரியான விளக்கத்தை அளித்தார். நியூட்டனின் சம காலத்தவரான எட்மண்ட் ஹாலி(Edmond Halley) தனது நண்பர் நியூட்டன் உருவாக்கிய இயக்க விதிகளைப் பயன்படுத்தி ஒரு பெரிய கண்டுபிடிப்பை நிகழ்த்தினார். 1531, 1607, 1682 ஆகிய ஆண்டுகளில் வானில் தென்பட்ட வால் நட்சத்திரம் ‘பழைய சுப்பன் தான்’ என்று அவர் கண்டுபிடித்துக் கூறினார். அதாவது கி.மு 240 ஆம் ஆண்டிலிருந்து அது திரும்பத் திரும்ப வந்து கொண்டிருக்கிறது. அதே வால் நட்சத்திரம் தான் இப்படி வருகிறது என்று அதுவரை யாராலும் கண்டுபிடிக்க முடியவில்லை.

பழைய குறிப்புகளையும் தாம் போட்ட கணக்குகளையும் வைத்துத் தான் எட்மண்ட் ஹாலி 1705 ஆம் ஆண்டில் அக்கண்டுபிடிப்பைச் செய்தார். அந்த வால் நட்சத்திரம் 76 ஆண்டுகளுக்கு ஒரு முறை தலை காட்டும் என்று கூறிய ஹாலி அது மீண்டும் 1758 ஆம் ஆண்டில் வரும் என்று சொன்னார்.

ஹாலி வால் நட்சத்திரத்தின்
சுற்றுப்பாதை 

அதன்படியே அந்த வால் நட்சத்திரம் அந்த ஆண்டில் மீண்டும் வந்தது. ஆனால் அப்போது ஹாலி உயிருடன் இருக்கவில்லை. அந்த வால் நட்சத்திரத்துக்கு அவரது பெயர் வைக்கப்பட்டு அது ஹாலி வால் நட்சத்திரம் என்று அழைக்கப்படுகிறது (Halley's Comet). ஹாலி தமது ஆயுட்காலத்தில் 24 வால் நட்சத்திரங்களின் சுற்றுப்பாதையைக் கணக்கிட்டுக் கூறினார். ஹாலி வால் நட்சத்திரம் மாதிரியே பல வால் நட்சத்திரங்கள் திரும்பத் திரும்ப வருகின்றன.

திரும்பத் திரும்ப வருகிற வால் நட்சத்திரங்களை அதுவரை யாராலும் அடையாளம் கண்டு பிடிக்க முடியாமல் போனது ஏன்? முதலில் ஒன்றைக் கவனிக்க வேண்டும். எட்மண்ட ஹாலி சுற்றுப்பாதையைக் கணக்கிட்டுத் தான் ஹாலி வால் நட்சத்திரம் மீண்டும் வரும் என்று கூறினார். அடையாளத்தை வைத்து அல்ல.

தவிர, ஒவ்வொரு வால் நட்சத்திரமும் சூரியனை நெருங்கும் போது நிறைய பொருளை இழக்கிறது. ஆகவே அடுத்த தடவை வரும் போது அது இளைத்துக் காணப்படுகிறது. சொல்லப் போனால் ஹாலி வால் நட்சத்திரம் 1986 ல் மறுபடி தலை காட்டிய போது அது சோபை இழந்து காணப்பட்டது. அடுத்து 2061 ஆம் ஆண்டில் அது மறுபடி தலை காட்டும் போது மேலும் இளைத்துக் காணப்படலாம்.

ஹாலி வால் நட்சத்திரம் இப்போது
நெப்டியூன் கிரகத்துக்கு அப்பால் உள்ளது.

ஒவ்வொரு தடவையும் சூரியன் காரணமாக ஏராளமான பொருளை இழக்கும் வால் நட்சத்திரங்கள் இனி இழப்பதற்கு ஒன்றுமில்லை என்ற கட்டத்தை எட்டும் போது என்ன ஆகும்? பனிக்கட்டி, தூசு, உறைந்த வாயுக்கள் என அனைத்தையும் இழந்த பின் வால் நட்சத்திரம் வெறும் பாறையாக அதாவது அஸ்டிராய்ட் (Asteroid) ஆக மாறி விடும். அப்போது அது பறக்கும் பாறை அல்லது பறக்கும் குட்டி மலை என்று சொல்லத்தக்க அளவில் இருக்கும்.

உதாரணமாக 1949 ஆம் ஆண்டில் ஒரு வால் நட்சத்திரம் கண்டுபிடிக்கப்ப்ட்டது. அதற்கு 107 P/Wilson-Harrington வால் நட்சத்திரம் என்று பெயரிட்டார்கள். பின்னர் 1979 ஆம் ஆண்டில் ஒரு அஸ்டிராய்ட் கண்டுபிடிக்கப்பட்டது. அதற்கு 1979 A என்று பெயரிட்டனர். பிறகு உன்னிப்பாக ஆராய்ந்ததில் அது 1949 ல் கண்டுபிடிக்க்ப்பட்ட அதே வால் நட்சத்திரம் என்று தெரிய வந்தது. அதாவது வால் நட்சத்திரமாக இருந்து அது பின்னர் அனைத்தையும் இழந்து பாறையாகி விட்டது.

 இதற்கு நேர் மாறாக ஒன்று நடந்தது. சுமார் 100 ஆண்டுகளுக்கு முன்னர் அஸ்டிராய்ட் ஒன்று கண்டுபிடிக்கப்பட்டது.அதற்கு 596 ஷெல்லா (596 Schella) என்று பெயரிட்டார்கள். எனினும் அமெரிக்க அரிசோனா பல்கலைக் கழகத்தைச் சேர்ந்த ஸ்டீவ் லாசன் 2010 ஆம் ஆண்டு வானை ஆராய்ந்த போது மேற்படி அஸ்டிராய்டு வால் நட்சத்திரம் போலத் தென்படுவதைக் கவனித்தார். பின்னர் மற்ற்வர்களும் ஆராய்ந்த போது உண்மையில் அது வால் நட்சத்திரமே என்பது தெரிய வந்தது. இப்படியாக ஆரம்பத்தில் அஸ்டிராய்டுகள் எனக் கருதப்பட்டவை பின்னர் வால் நட்சத்திரங்கள் என்று தெரிய வந்துள்ளது.

இது புதிய நிலைமையை உண்டாக்கியது. சூரிய மண்டலத்தில் செவ்வாய் கிரகத்தின் சுற்றுப்பாதைக்கும் வியாழன் கிரகத்தின் சுற்றுப்பாதைக்கும் இடையே கோடானு கோடி அஸ்டிராய்டுகள் கிரிவலம் செய்யும் பக்தகோடிகளைப் போல ஓர் ஒழுங்குடன் தனிப்பாதை அமைத்துக் கொண்டு சூரியனை சுற்றி வருகின்றன. இக்கூட்டத்தில் உள்ளவை அனைத்தும் சிறியதும் பெரியதுமான பாறைகளே.

இப்போது இந்த அஸ்டிராய்ட் கும்பலின் நடுவே வால் நட்சத்திரங்களும் உள்ளன என்பது தெரிய வந்துள்ளது. வானவியல் விஞ்ஞானிகள் இவற்றுக்கு Main Belt Comets  என்று பெயரிட்டுள்ளனர். இவை கிரகங்கள் மற்றும் அஸ்டிராய்டுகள் போல வட்ட வடிவப் பாதையில் சுற்றுகின்ற காரணத்தால் சூரியனுக்கு அருகில் வருகின்ற வாய்ப்பே இல்லாதவை.

வால் நட்சத்திரங்களைப் பற்றி மேலும் விவரமாக அறியும் பொருட்டு நாஸாவும் ஐரோப்பிய விண்வெளி அமைப்பும் கடந்த பல ஆண்டுகளில் வால் நட்சத்திரங்களை நோக்கி ஆளில்லா விண்கலங்களை அனுப்பின. இவற்றில் பலவும் வால் நட்சத்திரங்களுக்கு அருகாமையில் சென்று அவற்றைப் படம் பிடித்து அனுப்பின.

வில்ட்-2 என்னும் வால்
நட்சத்திரத்திலிருந்து தூசு
சேகரித்த ஸ்டார்டஸ்ட்
விண்கலம்

அந்த விண்கலங்களில் ஒன்று வால் நட்சத்திரத்தில் அடங்கிய பொருளின் சாம்பிளை சேகரித்து பூமிக்கு அனுப்பியது. நுண்ணிய வடிவிலான அப்பொருட்களை விஞ்ஞானிகள் ஆராய்ந்த போது தெரிய வந்த தகவல்கள் வால் நட்சத்திரங்கள் எப்படி உண்டாயின என்பது பற்றி விஞ்ஞானிகள் இதுவரை கொண்டிருந்த கொள்கைகளை அடியோடு தகர்க்கும் வகையில் உள்ளன.

இப்படியாக வால் நட்சத்திரங்கள் புதுக் குழப்பத்தை உண்டாக்கியுள்ளன. இந்த நிலையில் வால் நட்சத்திரங்கள் பற்றி நாம் முழுமையாக அறிந்து கொள்ள இன்னும் சில காலம் ஆகலாம் என்று தோன்றுகிறது.

பூமியை நோக்கி வரும் அஸ்டிராய்ட்

அஸ்டிராய்ட் ஒன்று பூமி இருக்கின்ற திசையை நோக்கி இப்போது வேகமாக வந்து கொண்டிருக்கிறது. ஆனால் அது பூமியின் மீது மோத வாய்ப்பே இல்லை என்று நிபுணர்கள் தெளிவுபடக் கூறியிருக்கிறார்க்ள.வருகிற நவம்பர் 9ஆம் தேதி இந்திய நேரப்படி அதிகாலை 5 மணிக்கு அது பூமியை மிக அருகாமையில் கடந்து செல்லவிருக்கிறது.

  இபபடத்தின் மீது கிளிக் செய்தால் அஸ்டிராய்ட் YU55
எவ்விதமாகக் கடந்து செல்லும் என்கிற அனிமேஷன்
 படத்தைக் காணலாம். .படம்: நன்றி JPL/NASA

அக்கட்டத்தில் அந்த அஸ்டிராய்ட் பூமியிலிருந்து 3,25,000 கிலோ மீட்டர் தொலைவில் இருக்கும். இது பூமிக்கும் சந்திரனுக்கும் உள்ள தூரத்தைக் காட்டிலும் குறைவு. அஸ்டிராய்ட் ஒன்று பூமிக்கு மிக அருகில் வருவது என்பது அபூர்வமே.

சூரிய மண்டலத்தில்அஸ்டிராய்டுகள்
சுற்றும் பாதை

அந்த அஸ்டிராய்டின் பெயர் 2005 YU55. அஸ்டிராய்டுகளுக்கு இப்போதெல்லாம் எண்களையும் எழுத்துக்களையும் பெயர்களாக வைக்கின்ற வழக்கப்படி அதற்கு YU55 என்று பெயர் வைக்கப்பட்டது. 2005 ஆம் ஆண்டில் கண்டுபிடிக்கப்பட்டது என்பதால் அதையும் சேர்த்துக் கொண்டுள்ளனர். இதன் குறுக்களவு வெறும் 400 மீட்டர். ஆகவே அளவை வைத்து இந்த அஸ்டிராய்டை ’பறக்கும் குன்று‘ என்று வர்ணிக்கலாம்.

சூரிய மண்டலத்தில் செவ்வாய் கிரகத்தின் சுற்றுப்பாதைக்கும் வியாழன் கிரகத்தின் சுற்றுப்பாதைக்கும் நடுவே லட்சோப லட்சம் அஸ்டிராய்டுகள் கிரிவலம் வரும் பக்தர்களைப் போல கும்பல் கும்பலாக சூரியனை சுற்றி வருகின்றன. இவற்றைக் குட்டி கிரகங்கள் (Minor Planets)  என்றும் வர்ணிப்பதுண்டு. இந்த அஸ்டிராய்ட் கும்பலிலிருந்து வழி மாறி எண்ணற்ற அஸ்டிராய்டுகள் தனிப் பாதை அமைத்துக் கொண்டு சூரியனை சுற்றுகின்றன. அப்படி வழி மாறிய அஸ்டிராய்டுகளில் 2005 YU55 அஸ்டிராய்டும் ஒன்று.

அஸ்டிராய்ட் 2005 YU55

வழி மாறிய அஸ்டிராய்டுகள் செவ்வாய், பூமி, வெள்ளி, புதன் ஆகிய கிரகங்களின் சுற்றுப்பாதைகளைக் குறுக்காக கடந்து சூரியனை நீள் வட்டப் பாதையில் சுற்றுகின்றன. இவ்விதம் பூமியின் சுற்றுப்பாதையைக் கடக்கும் போது தான் அவை பூமிக்கு அருகாமையில் வருகின்றன.இப்படிக் கடக்கும் போது இவற்றில் ஏதேனும் ஒன்று ஒரு வேளை பூமியில் மோத வாய்ப்பு உண்டா என்ற கேள்வி எழுகிறது.

ஆகவே தான் அமெரிக்காவின் நாஸா அமைப்பு இதே வேலையாக பூமிக்கு ஒரு வேளை ஆபத்தை ஏற்படுத்தக்கூடிய அஸ்டிராய்டுகளைத் தேடிக் கண்டுபிடித்து சுற்றுப்பாதை உட்பட அவை பற்றிய விவரங்களை சேகரிப்பதில் ஈடுபட்டுள்ளது. சமீபத்திய கணக்குப்படி 1256 அஸ்டிராய்டுகள் இவ்விதம் ஆபத்தை ஏற்படுத்தக்கூடியவையாக வகைப்படுத்தப்பட்டுள்ளன. இவை 100 மீட்ட்ருக்கும் மேலான குறுக்களவைக் கொண்டவை.

   

 நீல நிறத்தில் உள்ளது YU55 அஸ்டிராய்டின்
சுற்றுப்பாதை

அமெரிக்காவுக்கும் அப்போதைய சோவியத் யூனியனுக்கும் (ரஷியா) இடையே 1990 வரை கடும் விரோதப் போக்கு நீடித்து வந்தது.

வானில் சோவியத் யூனியன் செலுத்தும் ஏவுகணைகள், செயற்கைக்கோள்கள் ஆகியவற்றைக் கண்காணிப்பதற்காக அப்போது அமெரிக்கா நவீன தொழில் நுட்பத்துடன் கூடிய கருவிகளை உருவாக்கியது.

அமெரிக்கா-ரஷியா இடையிலான விரோதம் நீங்கிய பின்னர் அஸ்டிராய்டுகளைக் கண்காணிக்க இவை உதவலாயின. அமெரிக்கா இத்துறையில் மேலும் புதிய தொழில் நுட்பங்களை உருவாக்கி வருகிறது.